बझाङ ।
जिल्ला स्तरमा वितरण गरिने भीमदत्त उत्कृष्ट कृषक पुरस्कारको तयारीस्वरूप कृषि ज्ञान केन्द्र बझाङले आज छबिसपाथिभेरा गाउँपालिका–६ ल्वाडा र ७ अन्तर्गत पर्ने खोरी क्षेत्रमा स्थलगत कृषि अनुगमन सम्पन्न गरेको छ ।
अनुगमन टोलीको नेतृत्व वाली संरक्षण प्राविधिक समितिका संयोजक तथा कृषि ज्ञान केन्द्र बझाङका सहायक वाली संरक्षण अधिकृत जनक सिंहले गरेका थिए । टोलीमा भेटनरी अस्पताल तथा पशु सेवा कार्यालयमा कार्यरत समिति सदस्य जय बहादुर खड्का र समन्वय समितिका यज्ञ खत्री सहभागी थिए ।
कृषकहरूको उत्पादन प्रणाली, व्यवस्थापन सीप, प्रविधिको प्रयोग, मेहनत तथा योगदानको मूल्याङ्कन गरी बझाङ जिल्लाभरिबाट छनोट गरिने उत्कृष्ट तीन जना कृषकहरूलाई यो पुरस्कार प्रदान गरिनेछ । प्रतियोगितात्मक मूल्याङ्कनका आधारमा छनोटमा पर्ने प्रथम, द्वितीय र तृतीय स्थान हासिल गर्ने कृषकलाई क्रमशः रु २५,००० नगद पुरस्कार प्रदान गरिनेछ ।
अनुगमन टोलीले खोरी क्षेत्रका खेतबारी, पशुपालन, बाली व्यवस्थापन, रोग नियन्त्रण, मल प्रयोग र कृषकहरूको सक्रियता अवलोकन गरेको थियो ।
अनुगमनपछिको अन्तरक्रियामा संयोजक जनक सिंहले भने, “यहाँका कृषकहरूले धेरै राम्रो काम गर्नुभएको छ। तर तालिमको अभाव देखिन्छ। त्यसैले आगामी दिनमा आवश्यक तालिमहरू सञ्चालन गरिनेछ।” उनले खेतीमा निरन्तर उत्कृष्टता देखाउने कृषकहरूलाई केन्द्रबाट अनुदानको व्यवस्था गरिने पनि जानकारी गराए । साथै उनले थपे “भीमदत्त उत्कृष्ट पुरस्कारको लागि हालसम्म कृषि तथा पशु सेवा तर्फबाट जिल्लाभरिबाट १७ वटा आवेदन प्राप्त भएका छन् र तिनै आधारमा अनुगमन कार्य भइरहेको छ ।”
खोलापारी कृषक समूहका अध्यक्ष मकर बोहराले कृषि ज्ञान केन्द्रको सहयोगले कृषकहरूमा आत्मविश्वास बढेको र उत्पादनमा पनि सुधार आएको बताए । “उब्जनी राम्रो भएको छ, तर अहिलेको मुख्य चुनौती भनेको बजार नपाइनु हो,” उनले भने ।
अनुगमन टोलीले जिल्लाका अन्य स्थानहरुमा पनि स्थलगत अनुगमन गरि प्राबिधिक समितिले मुल्यांकनका आधारमा पुरस्कार प्रदान गरिन बताएका छन् ।
