सुदूरपश्चिममा बिसु पर्वको चहलपहल, घर फर्किने र लिपपोत गर्ने चलन तीव्र

धनगढी- सुदूरपश्चिमको सांस्कृतिक पहिचानका रूपमा रहेको बिसु पर्व नजिकिएसँगै चहलपहल बढ्न थालेको छ। नयाँ वर्षको पहिलो दिन, वैशाख १ गते मनाइने बिसु पर्वका लागि रोजगारी वा अध्ययनको सिलसिलामा घर बाहिर गएका मानिसहरू गाउँ फर्किन थालेका छन्।
घर लिपपोत गर्ने परम्परा पनि सुरु भइसकेको छ। जनविश्वास अनुसार चैतमै घर लिपपोत गरेमा वर्षभरि सुख, शान्ति र समृद्धि हुने मानिन्छ। यद्यपि, पछिल्लो समय सिमेन्टको प्रयोग बढेसँगै कमेरो र रातो माटोको प्रयोगमा कमी आएको छ।
बिसु पर्वमा सिस्नो लगाउने परम्परा विशेष रूपमा मानिन्छ। यस दिन बिहानै नुहाएर शरीरमा सिस्नो लगाउने चलन छ, जसबाट वर्षभर लाग्न सक्ने रोगहरूबाट बचिने धार्मिक विश्वास छ। देवर-भाउजू, नन्द-भाउजू, साली-भिनाजु र फुपु-सालीबीच सिस्नो पानी छ्याप्दै पर्व मनाउने चलन समेत रहेको छ।
बिसु पर्वको अवसरमा बिहे गरेर गएका छोरीचेली माइत आउने, मिठा परिकार बनाइने र गाउँभर उत्सवको माहोल बन्ने गर्छ।