धनगढी- बालेन शैलीमा कञ्चनपुरको एक स्थानीय तहले ग्रामीण सडकमा डोजर फेसनको नक्कल गरेको छ ।
जिल्लाको बेलडाँडी गाउँपालिकाले ममंगलबार चवन्नी बजार क्षेत्रमा डोजर फेसनको नक्कल गरेको हो ।
देशका अधिकांश शहरी क्षेत्रका बजार फराकिलो पार्ने योजना बनाउँदै कतिपय महानगर तथा उपमहानगरपालिकामा डोजर चलाएर प्रमुखहरूले चर्चा कमाइरहेको बेला कञ्चनपुरको ग्रामीण क्षेत्र बेलडाँडी गाउँपालिकाका अध्यक्ष हरिशचन्द्र रानाले डोजर फेसनको नक्कल गरेका स्थानीयले बताए ।
पालिकाले जनघनत्व र सवारीसाधनको ओहोरदोहोर खासै नहुने चवन्नी बजारको सडकलाई कतै ३० , कतै १२ त कतै ६ मिटर बनाउन पक्की संरचनानै भत्काउन तम्सिएपछि स्थानीयहरू आक्रोशित हुनुका साथै बिरोधमा उत्रिएका छन् ।
स्थानीय कृष्णा थापाले भनिन् नगरपालिकाले स्थानीयसँग समन्वय, छलफल तथा सहमति बिनै एकलौटीरुपमा शासन गर्न थालेको छ । हामीले बारम्बार पालिकामा गएर छलफल तथा समन्वय गरौ भन्दा अध्यक्ष ज्यू नै उपस्थिति नहुने गरेको उनलेे सुनाइन् ।
त्यस्तै अर्का स्थानीय विक्रम खड्काले अध्यक्ष रानाले जनतालाई त्रसित पार्न आफ्नै घरमा डोजर चलाएका जानकारी दिए ।
कुनै अध्ययन नगरी, पालिकाले कुनै योजना नबनाई ठाडो आदेशको भरमा डोजर चलाएर सर्वसाधारणको घर भत्काउने कार्य गरेको पालिका उपाध्यक्ष शान्ति नाथले बताइन् । उनी भन्छिन् पहिला स्थानीयलाई पालिकामा उपस्थित गराएर बाटो बनाउने निर्णय गरेको तर अहिले पालिकाले सडक छेउछाउमा भएका घर तथा टहरा भत्काउने थालेको छ, यो सरासर जनता माथि अन्याय हो ।
कार्यपालिकामा आफ्नो बाटो बनाउने निर्णयमा सहमति भएपनि घर टहरा भत्काउने निर्णयमा भने सहमती नरहेको उनको दाबी छ । उनलेे थप्दै भनिन् यो क्षेत्र ठूलो भिडभाड हुने ठाउँ पनि होइन ,यो गाउँको बजार हो, जेठ–बैशाखमा यहाँका सडकहरू सुनसान हुन्छन् । १२ मिटर सडक बनाउँदा पनि हुन्थ्यो , यसो गर्दा स्थानीयका घर टहरा पनि जोगिन्थे । जुन नगरपालिकाले डोजर चलाउने कार्य गरिरहेको छ यो सरासर गलत हो।
संघीय सरकारको योजनाअन्तर्गत सडकलाई १२ मिटर स्तरोन्नति गर्नुपर्ने भए पनि पालिका अध्यक्ष रानाले यहीँ मौकामा कतै स्थानीयको घरटहरा नै जाने गरि ३० मिटर सम्म सडक फराकिलो पार्दे सर्वसाधारणका घर भत्काएर चर्चा कमाउने होडबाजी सुरु गरेको आरोप छ ।
यसविषयमा कामना टुडेले अध्यक्ष राना सँग बुझ्न खोदा फोन उठेन ।
