काठमाडौँ- आईसीसी टी–२० विश्वकप एशिया तथा इस्ट एसिया–प्यासिफिक छनोटको सुपर सिक्स चरणमा प्रवेश गरेको नेपालले आज यूएईसँग प्रतिस्पर्धा गर्दैछ। खेल ओमानमा नेपाली समयअनुसार दिउँसो सवा ४ बजे सुरु हुनेछ।
सुपर सिक्स चरणमा नेपालले यूएईसहित कतार, ओमान र सामोआसँग प्रतिस्पर्धा गर्नेछ। समूह ‘ए’ बाट यूएई र कतार, समूह ‘बी’ बाट नेपाल र जापान तथा समूह ‘सी’ बाट ओमान र सामोआ अघिल्लो चरणमा पुगेका हुन्।
नेपाल र यूएई दुवैले सुपर सिक्समा समान दुई अंक जोडिसकेका छन्। समूह चरणमा नेपालले जापानसँग पहिले नै खेलिसकेकाले अब सुपर सिक्समा त्यस टोलीसँग पुनः खेल्नुपर्ने छैन।
नेपालले भोलि कतार, बुधबार ओमान र शुक्रबार सामोआसँग खेल्ने तालिका बनाएको छ। सुपर सिक्सको शीर्ष तीन टोलीले आगामी वर्ष भारत र श्रीलङ्कामा हुने टी–२० विश्वकपमा स्थान पाउनेछन्।
