बझाङ- बझाङको छबिसपाथिभेरा गाउँपालिका–७ मा अवस्थित मजखाेरी माध्यमिक विद्यालयमा अध्यापन गर्दै आएका शिक्षक रामचन्द्र मण्डेलको अनिवार्य अवकाशसँगै सम्मानपूर्वक विदाइ गरिएको छ । विद्यालयले सोमबार आयोजना गरेको विशेष कार्यक्रममा प्रावि तहमा लामो समयसम्म सेवा पुर्याएका मण्डेललाई दोसल्ला, खादामाला र नागरिक अभिनन्दनसहित सम्मानपूर्वक विदाइ गरेको हो ।
गाउँपालिका उपाध्यक्ष लक्षिमन बोहराको प्रमुख आतिथ्यतामा सम्पन्न कार्यक्रममा वडाध्यक्ष तथा विद्यालय व्यवस्थापन समिति अध्यक्ष विजय बहादुर धामीले विदाइ कार्यक्रममा विद्यालय परिवार भावविह्वल बनेको जानकारी दिए ।
शिक्षक मण्डेलले स्थायी रूपमा ३८ वर्ष र अन्य गरी जम्मा ४४ वर्ष अध्यापन गरेको स्मरण गर्दै आफ्नो शिक्षण यात्राका अनुभवहरू कार्यक्रममा बाँडे । उनले विद्यार्थीलाई मन लगाएर अध्ययन गर्न, शिक्षकहरूलाई कर्तव्यप्रति निष्ठावान रहन आग्रह गर्दै विद्यालयका लागि सदैव सहयोग गर्ने प्रतिबद्धता व्यक्त गरे ।
विदाइकै दिन शिक्षक मण्डेलले आफ्ना दिवंगत पिता धस्से मण्डेलको नाममा विद्यालयमा ३१ हजार रुपैयाँको अक्षकोष स्थापना गरेका छन् । उक्त अक्षकोषबाट प्राप्त हुने ब्याजमार्फत विद्यालयमा उत्कृष्ट नतिजा ल्याउने विद्यार्थीलाई सम्मान गर्ने र गरिब, जेहन्दार तथा टुहुरा विद्यार्थीको अध्ययनमा सहयोग गर्ने उद्देश्य रहेको उनले बताए ।
कार्यक्रममा स्थानीय अभिभावक, विद्यार्थी, विद्यालय व्यवस्थापन समिति, राजनीतिक दलका प्रतिनिधि, शिक्षाप्रेमी, समाजसेवी र बुद्धिजीवीहरूको समेत उपस्थितिमा शिक्षक मण्डेललाई सम्मानपूर्वक घरसम्म पुर्याइएको थियो ।
विद्यालय प्रशासनले शिक्षण क्षेत्रमा मण्डेलले पुर्याएको योगदान सदैव प्रेरणादायी रहने उल्लेख गर्दै उनको उज्ज्वल भविष्यको शुभकामना व्यक्त गरेको छ । शिक्षक मण्डेल यहीँ भदौ १५ गते उमेर हदका कारण अनिवार्य अवकाश हुनु भएको हो ।
