बझाङ : वर्षातले बिग्रिएका कतिपय बझाङका ग्रामीण सडकहरु नबन्दा यात्रुहरुलाई सास्ती भएको छ । वर्षातको समयमा पानीका कारण ठाउँ ठाउँमा खाल्टा खुल्टी परेर बिग्रिएका सडक समयमै मर्मत नहुँदा ओहोरदोहर गर्ने यात्रुहरुलाई अहिले सास्ती भएको हो ।
वर्षातले बिग्रिएका सडक नबन्दा जोखिम मोलेर यात्रा गर्नेु परेको यात्रुहरुको गुनासो छ । जिल्लाका विभिन्न पालिका भित्र रहेका ग्रामीण सडकहरु वर्षातका कारण बिग्रिएका छन् । बर्षातले भत्कीएर, खाल्टा खुल्टी परे पनि सम्बन्धित निकायले समयमै मर्मत नगरिदिदा समस्या भएको खप्तडछान्ना गाउँपालिका ५ कि स्थानिय सविता उपाध्यायले बताउनुभयो ।
जिल्लाको खप्तडछान्ना गाउँपालिकामा सडक बन्द भएको २ महिना पूरा भएपनि अझै सुचारु नभएको स्थानियहरुको गुनासो छ । दैनिक कामकाजको लागि पालिकाबासिहरु नियमित जोखिम मोलेर ओहोरदोहोर गरिरहेपनि बाटोको अवस्था ठिक नहुँदा समस्या भएको बताइएको छ ।
जिल्लाको बुङ्गल नगरपालिकामा पनि सडक पुर्ण रुपमा बन्द भएको महिनौ भएको छ । यसैबिच थलारा गाउँपालिकाको झनाना देखि जडार, दुर्गाथली र केदारस्यु गाउँपालिका जोड्ने चुवाबन काँडाचौर हुदै बिजगडा, केदारस्यु गाउँपालिकाको भाँडे पौडी हुँदै लोतु र जयपृथ्वी नगरपालिका ३ स्थित डुङ्री गाड र जिन्नाडि गाड बढेर मस्टा गाउँपालिका जोड्ने सडक अवरुद्ध रहेका छन् वर्षाले सडकखण्ड अवरुद्ध भएको महिनौ भएपनि स्थानीय सरकारको ध्यान नगएको नागरिकहरुको आरोप छ ।
यसैबिच सडकखण्ड अवरुद्ध भएपछि बुङ्गल नगरपालिकामा खाना पकाउने एलपी ग्याँसको अभाव देखिएको छ । यातायातका साधान चल्न नसक्दा बजारमा दैनिक प्रयोग हुने खाना पकाउने एलपी ग्याँस संगै उपभोग्य सामान, खाद्यवस्तु ,लगाएत तरकारीको पनि अभाव देखिएको विजगडाका व्यवसायि धन बहादुर धामीले जानकारी दिए ।
दैनिक उपभोग्य वस्तुहरूको समेत बजारमा चरम अभाव भए संगै सामानको मुल्य पनि अकाशिय पछि सर्वसाधारणहरू मर्कामा परेका छन ।
