निर्माण सम्पन्न भएको दुई महिनामै भासियो चैनपुर-ताक्लाकोट सडक, ३० भन्दा बढी घर जोखिममा

बझाङ– निर्माण सम्पन्न भएको दुई महिना नबित्दै चैनपुर–ताक्लाकोट सडक भासिन थालेपछि बझाङमा सडक निर्माणको गुणस्तरमाथि गम्भीर प्रश्न उठेको छ। पक्की सडक भासिँदा जयपृथ्वी नगरपालिका–११ को रुइनाबगर र तलकोट गाउँपालिका–१ को सुनिकोटका ३० भन्दा बढी घर जोखिममा परेका छन्।
बझाङ सदरमुकाम चैनपुरबाट करिब ५ किलोमिटर उत्तरमा रहेको सडकको रुइनाबगरमा गाउँको माथिल्लो भागतर्फ करिब ४० मिटर र सुनिकोट बजारभन्दा तल करिब ३० मिटर सडक भासिएको छ। दुवै स्थानमा सडक करिब एक मिटर तल दबिएको र भासिने क्रम अझै नरोकिएको सडक कार्यालयले जनाएको छ।
सबैभन्दा गम्भीर प्रश्न भनेको—गत जेठमा मात्रै कालोपत्र सम्पन्न भएको सडक दुई महिनामै किन भासियो? करोडौँ रुपैयाँ खर्च गरेर निर्माण गरिएको सडकले वर्षा थेग्न नसक्नुले निर्माणको गुणस्तर, डिजाइन र अनुगमनमाथि प्रश्न खडा गरेको छ।
सेती लोकमार्ग उत्तर खण्ड (चैनपुर–ताक्लाकोट) सडक कार्यालयका प्रमुख वीरेन्द्र यादवका अनुसार सडक दबिने क्रम जारी रहेकाले थप क्षति हुन सक्ने अनुमान गरिएको छ। तत्कालका लागि अस्थायी मर्मत तथा बर्खापछि भित्ता काट्ने वा भासिएको स्थानमा पिलर तथा आरसीसी संरचना निर्माण गर्ने गरी स्थायी समाधानको अध्ययन भइरहेको छ।
सडक थप भासिए जिल्लाका उत्तरी क्षेत्रमा सञ्चालन हुने यातायात सेवा पूर्णरूपमा प्रभावित हुन सक्ने जोखिम छ। तलकोट र साइपाल गाउँपालिकाका स्थानीयसँगै साइपाल क्षेत्रमा जाने पर्यटकका लागि समेत यो महत्वपूर्ण सडक हो।
निर्माण सम्पन्न भएको दुई महिनामै सडक भासिएपछि अहिले स्थानीयको प्रश्न एउटै छ—सडक बन्यो कि बजेट मात्रै सकियो? नयाँ सडकको यस्तो अवस्था देखिएपछि निर्माणमा प्रयोग भएको सामग्री, प्राविधिक डिजाइन, निर्माण कम्पनीको काम र सम्बन्धित निकायको अनुगमनमाथि तत्काल छानबिन आवश्यक देखिएको छ।