बैतडी- विगत २७ वर्षदेखि दलित बस्तीमा वैदिक विधिअनुसार कर्मकाण्ड गर्दै आएका वैदिक वाचस्पति, संस्कारशिरोमणि, धर्मशास्त्राचार्य तथा ज्योतिषाचार्य पण्डित गणेशप्रसाद पन्त सुदूरपश्चिमका तीन स्थानीय तहबाट सम्मानित भएका छन्।
बैतडीको पाटन नगरपालिका-८ निवासी पन्तलाई डोटीको दिपायल सिलगढी नगरपालिका, डडेल्धुराको अजयमेरु गाउँपालिका र बैतडीको पुर्चौडी नगरपालिकाले सामाजिक तथा धार्मिक योगदानको कदर गर्दै सम्मान गरेका हुन्।
पन्तले दलित समुदायमा वैदिक विधिअनुसार सप्ताह, शिवपुराण, व्रतबन्ध, विवाह, न्वारन, वास्तुपूजा, गृहप्रवेशलगायतका धार्मिक अनुष्ठान सञ्चालन गर्दै आएका छन्। उनले हालसम्म ३८ वटा सप्ताह, २४ वटा शिवपुराण, २९७ वटा लघुरुद्राभिषेक, १९३ वटा महारुद्राभिषेक, ३ हजार ९११ वटा न्वारन, ५६९ वटा व्रतबन्ध, ७२२ वटा सत्यनारायण पूजा, ६२२ वटा ग्रहशान्ति, ३९ वटा शतचण्डी, ६५ वटा अखण्ड रामायण, ५७९ वटा स्वस्थानी व्रतकथा, ५५ वटा त्रिपिण्डी श्राद्ध र ७९ वटा गरुड पुराणसहित ४११ भन्दा बढी प्रकारका धार्मिक कर्मकाण्ड सम्पन्न गरिसकेको बताएका छन्।
बैतडीस्थित वनारसीधाम विश्वनाथ ज्योतिर्लिङ्गका मूल पुजारीसमेत रहेका पन्तले जातीय विभेद र धार्मिक कुरीति अन्त्य गर्ने उद्देश्यले दमाई, कामी, बादी, पोणे, कुमाललगायत सिल्पी समुदायका १ हजार ६९९ जनालाई जनैधारण गराइसकेको तथा ४२२ दलित महिलालाई दूधागो (दोरक) धारण गराएको जानकारी दिए।
उनले जातीय विभेद कानुनतः अपराध भएकाले यसको अन्त्यका लागि आफूजस्तै धार्मिक अगुवाहरू पनि सक्रिय हुनुपर्ने बताए। यद्यपि, सामाजिक कुरीति अन्त्यको अभियान चलाउँदा आफ्ना ५७५ गैरदलित यजमान गुमाउनुका साथै सामाजिक सञ्जालमार्फत गालीगलौजसमेत सहनुपरेको उनले बताए।
