धनगढी । लाइन्स क्लब अफ धनगढी आरम्भको वर्ष २०२६/०२७ का लागि नयाँ कार्यसमिति सर्वसम्मत रूपमा चयन गरिएको छ। आइतबार धनगढीस्थित लोटस क्याफेको सभा हलमा सम्पन्न साधारण सभाले लायन आयान नविन धामीलाई अध्यक्षमा चयन गरेको हो।
साधारण सभाबाट अध्यक्षसहित विभिन्न पदाधिकारीहरू चयन गरिएको क्लबले जनाएको छ। नवगठित कार्यसमितिअनुसार प्रथम उपाध्यक्षमा लायन दीपक राज जोशी, द्वितीय उपाध्यक्षमा लायन केवल राज जोशी, तृतीय उपाध्यक्षमा लायन तर्कराज भट्ट, सचिवमा लायन दीपक जोशी तथा कोषाध्यक्षमा लायन हेमन्त पन्त चयन भएका छन्।
क्लबका निवर्तमान अध्यक्ष चेतन चन्दको अध्यक्षतामा सम्पन्न कार्यक्रममा Lions International District 325N का District Senior Executive Chief (GMT Coordinator) PMJF जनक राज जोशी विशिष्ट अतिथिका रूपमा सहभागी भएका थिए।
नवनिर्वाचित अध्यक्ष धामीले आफ्नो कार्यकालमा क्लबको सामाजिक उत्तरदायित्वलाई थप प्रभावकारी बनाउँदै शिक्षा, स्वास्थ्य, वातावरण संरक्षण तथा मानवीय सेवाका क्षेत्रमा सक्रिय भूमिका निर्वाह गर्ने प्रतिबद्धता व्यक्त गरेका छन्।
लाइन्स क्लब अफ धनगढी आरम्भले विगतदेखि नै विभिन्न सामाजिक तथा सेवामूलक गतिविधिहरू सञ्चालन गर्दै आएको छ। नयाँ नेतृत्व चयनसँगै आगामी कार्यकालमा क्लबका कार्यक्रम तथा गतिविधिहरूलाई थप प्रभावकारी, व्यवस्थित र विस्तार गरिने अपेक्षा गरिएको छ।
