बझाङ- आगामी प्रतिनिधि सभा सदस्यको निर्वाचनका लागि बझाङमा चुनावी सरगर्मी उत्कर्षमा पुगेको छ। यसै क्रममा नेकपा (एमाले) का उम्मेदवार ऐन महर जिल्लाको विकास र पूर्वाधार निर्माणका ठोस एजेन्डाहरू सहित मतदाताको घरदैलोमा पुगेका छन्।
अन्य उम्मेदवारहरूले चुनाव केन्द्रित प्रचार गरिरहँदा महरले भने बझाङको आर्थिक र सामाजिक रूपान्तरणका लागि सडक, सुरुङमार्ग र बजेट व्यवस्थापनलाई मुख्य प्राथमिकतामा राखेका छन्।
के छन् महरका मुख्य चुनावी प्रतिबद्धता?
एमाले उम्मेदवार महरले बझाङको भूगोल र आवश्यकतालाई बुझेर निम्न योजनाहरू अघि सारेका छन्:
१. चीनसँगको पहुँच:
सामरिक र व्यापारिक महत्त्वको ताक्लाकोट सडक खण्डलाई पूर्ण रूपमा सञ्चालनमा ल्याउने। २. सुरुङमार्गको नवीन सोच: विकट साइपाल क्षेत्रको पहुँचलाई सहज बनाउन सुरुङमार्गको अध्ययन प्रक्रिया अगाडि बढाउने।
३. राजमार्गको स्तरोन्नति:
जयपृथ्वी राजमार्गलाई फराकिलो बनाउने र आधुनिक मापदण्डअनुसार स्तरोन्नति गर्ने।
४. सेती लोकमार्गको कालोपत्रे:
सेती करिडोर सडकलाई पूर्ण रूपमा सञ्चालन गरी कालोपत्रे गर्ने कार्यलाई तीव्रता दिने।
५. संसदमा सशक्त उपस्थिति:
बझाङका विद्यमान समस्याहरूलाई संसदको रोष्ट्रममा प्रभावकारी रूपमा उठाउने र विकासका लागि पर्याप्त बजेट सुनिश्चित गर्ने।
विकासप्रेमी नेताको पहिचान
महरका समर्थकहरूले उनलाई ‘काम गर्न सक्ने र स्पष्ट भिजन भएको’ नेताका रूपमा चित्रण गरिरहेका छन्। चुनावी अभियानका क्रममा महरले भने, “बझाङलाई अब कुराले होइन, ठोस कामले बदल्नुपर्छ। सडक र पूर्वाधार नै यहाँको समृद्धिको आधार हुन्।”
बझाङमा सात दलका उम्मेदवार चुनावी मैदानमा भए पनि विकासका स्पष्ट एजेन्डा र सडक सञ्जालको विस्तारमा महरले लिएको अडानले मतदाताहरूमाझ सकारात्मक चर्चा पाएको छ।
