कञ्चनपुर- प्रेस चौतारी नेपालका केन्द्रीय अध्यक्ष गणेश पाण्डेले नेकपा (एमाले) अध्यक्ष केपी शर्मा ओली राष्ट्रको आवश्यकता भएको बताएका छन्।
शुक्रबार कञ्चनपुरमा आयोजित प्रेस चौतारी नेपाल सुदूरपश्चिम प्रदेश बैठकको उद्घाटन सत्रलाई सम्बोधन गर्दै अध्यक्ष पाण्डेले ओलीलाई वर्तमान समयका राजनीतिक, सामाजिक र राष्ट्रिय चुनौतीहरूको सामना गर्न सक्षम एक मात्र नेता भनेका हुन्।
प्रशिक्षण कार्यक्रमलाई सम्बोधन गर्दै उनले भने, “अहिलेको चुनौतीको सामना गर्न दृढ, स्पष्ट र निडर नेतृत्व ओलीसँग मात्रै छ।”
त्यस अवसरमा उनले प्रविधिमैत्री र न्यू मिडिया अनुकूल पत्रकारिता समयको आवश्यकता भएको उल्लेख गरे। पाण्डेले पत्रकारिता समाजको आवश्यकता र चाहनालाई सम्बोधन गर्न सक्नुपर्ने तथा विश्वाससहितको सूचना प्रवाह गर्ने हुनुपर्नेमा जोड दिए।
“त्यो लक्ष्य प्राप्तिको यात्रामा हामी छौं, र यसको अगुवाइ प्रेस चौतारीले नै गर्नुपर्छ,” उनले भने, “नेपाली पत्रकारितालाई दिशा निर्देश गर्ने क्षमता र योग्यता हामीसँग छ, र यसलाई निरन्तरता दिनेछौं।”
