सुदूरपश्चिम प्रदेशमा कृषि क्षेत्रले तीव्र गतिमा प्रगति गर्दै आएको छ। समृद्धिको दिशामा अग्रसर प्रदेश सरकारले कृषि क्षेत्रलाई विकासको मेरुदण्ड मानेर विविध कार्यक्रममार्फत सक्रिय हस्तक्षेप गरिरहेको छ।
प्रदेश सरकारले सुशासन र समावेशी विकासको आधारशिला कृषि नै हो भन्ने दृष्टिकोणसहित कृषि क्षेत्रलाई प्राथमिकतामा राख्दै आएको छ। पछिल्लो समय प्रदेशका विभिन्न स्थानमा कृषि विकासको गतिशीलता देखिन थालेको छ।
विशेषगरी कैलाली जिल्लामा रहेको कृषि ज्ञान केन्द्रलाई स्थानीय समुदायसँग अझ नजिक ल्याउने उद्देश्यले विविध कार्यक्रम सञ्चालन गरिएका छन्। घोडाघोडी, टिकापुर, गौरीगंगा, र लम्कीचुहा जस्ता नगरपालिका क्षेत्रहरूमा कृषि पूर्वाधार विस्तारसँगै निजी तथा सामुदायिक लगानी बढेको, त्यसको प्रतिफलस्वरूप उत्पादनमा समेत सकारात्मक वृद्धि देखिएको छ।
प्रदेश सरकारका भूमि व्यवस्था, कृषि तथा सहकारी मन्त्री वीरबहादुर थापाको नेतृत्वमा हालै सम्पन्न अनुगमन भ्रमणमा कृषि क्षेत्रमा भइरहेको प्रगति र किसानहरूको सहभागिता प्रत्यक्ष अवलोकन गरिएको थियो। अनुगमन टोलीले खेतबारीमा पुगेको र कृषकहरूसँग प्रत्यक्ष संवाद गरेर उत्पादन, प्राविधिक सहयोग, बजारीकरण लगायतका पक्षमा जानकारी लिएको थियो।
मन्त्री थापाले कृषि क्षेत्र प्रदेशको समग्र विकासको आधार भएको उल्लेख गर्दै, “किसानको श्रम र विश्वासलाई मूल्य दिने गरी आगामी बजेट निर्माण गरिनेछ,” भनी प्रतिवद्धता जनाए। उनले अनुगमनका क्रममा देखिएका समस्याहरू सम्बोधन गर्दै आगामी योजनामा आवश्यकता र सम्भावनाका आधारमा कार्यक्रम समावेश गरिने समेत बताए।
अनुगमनमा कृषि ज्ञान केन्द्र कैलालीका प्रमुख टेक बहादुर विष्ट, पशु सेवा कार्यालयका प्रमुख बिनोद कठायत लगायत पत्रकारहरुको संयुक्त अनुगमन भएको थियो
सरकारको यस्तो सक्रियताले कृषि क्षेत्रमा थप उत्साह र भरोसा थपेको छ। स्थानीय किसानहरूले उत्पादनमा आएको वृद्धिले उनीहरूमा नयाँ सम्भावनाको ढोका खोलेको अनुभव सुनाएका छन्। यसले प्रदेश सरकारको कृषि उन्मुख नीतिलाई थप सार्थक बनाइरहेको छ।
