बझाङ — बझाङको सदरमुकाम चैनपुरस्थित प्रशासन टोलका स्थानीय महिला तथा पुरुषहरुले देउसी भैलो खेलेर उठाएको रकम धार्मिक कार्यमा लगाएका छन् ।
तिहारको बेला मौलिक सांस्कृतिक परम्परालाई संरक्षण गर्दै संकलन गरिएको उक्त रकमबाट जिल्लाको प्रसिद्ध सुर्मा मन्दिरमा ९ केजी तौल भएको विशाल घण्टा चढाइएको हो।
स्थानीय अगुवा रमलाल बोहराको नेतृत्वमा गठित टोलीले यस वर्षको देउसी भैलो अभियानलाई केवल मनोरञ्जनमा सीमित नराखी, समाजप्रति उत्तरदायित्व बहन गर्ने खालको उदाहरणीय कार्यमा रुपान्तरण गरेको हो । टोलमा संकलित रकममध्ये केही हिस्सा अन्य सामाजिक कार्यहरूमा समेत खर्च गरिएको स्थानीय रुमला जाग्रीले जानकारी दिइन्।
“हामीले सबैको सहकार्यमा यो कदम चालेका हौं। बाँकी रहेको रकमबाट ९ केजीको घण्टा खरिद गरी सुर्मा मन्दिरमा चढायौं। यसले हाम्रो संस्कृतिलाई मात्र नभई आस्थालाई पनि बलियो बनाएको छ ।
उक्त टोलले समुदायको सहकार्य र एकताको पनि ज्वलन्त उदाहरण प्रस्तुत गरेको छ। सामाजिक, सांस्कृतिक तथा धार्मिक रूपमा प्रेरणादायी बनेको यो कार्यले अबका दिनमा अन्य टोल तथा गाउँहरूलाई पनि यस्तै सकारात्मक पहल गर्न हौसला दिने विश्वास गरिएको छ।
