तप्पा, कैलाली – नोभा हस्पिटल प्रा. लि., धनगढीको आयोजना तथा श्री दिव्य युवा क्लब, तप्पाको सहकार्यमा सम्पन्न १ दिने निःशुल्क स्वास्थ्य शिविर मा ३२० जना ले स्वास्थ्य सेवा लिएका छन्।
शनिबार सम्पन्न शिविरमा वरिष्ठ हाडजोर्नी, नसा तथा मेरुदण्ड रोग विशेषज्ञ डा. ललित चौधरी सहितको अनुभवी चिकित्सक टोलीले सेवा प्रदान गरेका थिए। शिविरमा आएका बिरामीलाई निःशुल्क औषधि वितरण गरिएको थियो। फार्मेसी प्रमुख दिपेन्द्र कठरिया का अनुसार सबै बिरामीलाई आवश्यक औषधि वितरण गरिएको छ।
श्री दिव्य युवा क्लब, तप्पाका अध्यक्ष भजोहर कठरिया ले गाउँमा यस्ता स्वास्थ्य सेवा पुग्नुलाई महत्वपूर्ण उपलब्धि भन्दै आगामी दिनमा पनि स्वास्थ्यसम्बन्धी कार्यक्रमहरू सञ्चालन गरिने जानकारी दिए। उनले स्थानिय तह तथा अन्य संघसंस्थासँग सहकार्य गरी थप व्यापक सेवा प्रदान गर्ने प्रतिबद्धता जनाए।
नोभा हस्पिटलका प्रशासन प्रमुख पदम राज भट्ट ले स्वास्थ्य शिविर सफल बनाउन स्थानीयवासीको साथ र सहभागिता सराहनीय रहेको बताए। साथै, उनले सोही पर्चा लिएर नोभा हस्पिटल धनगढी पुग्ने बिरामीलाई अन्य आवश्यक स्वास्थ्य परीक्षणमा समेत छुट प्रदान गरिने जानकारी दिए।
शिविरमा हाड-कमर दुखाइ, घुँडा तथा जोर्नी दुखाइ, बाथरोगसम्बन्धी उपचार तथा नशा ट्यापिङ लगायतका सेवा प्रदान गरिएको थियो। आयोजक टोलीका अनुसार आगामी दिनमा पनि यस्ता शिविरलाई निरन्तरता दिने योजना रहेको छ।
