काठमाडौं । अनेरास्ववियु (क्रान्तिकारी) को २३औं राष्ट्रिय महाधिवेशनका लागि विद्यार्थी नेता उपदेश कुमार यादवले अध्यक्ष पदमा उम्मेदवारी दर्ता गरेका छन्। सरल, इमानदार र कार्यदक्ष नेताको छवि बनाएका यादवले लामो समयदेखि विद्यार्थी आन्दोलनको नेतृत्व गर्दै आएका छन्।
विद्यार्थीका हक, अधिकार र हितका लागि लगातार आवाज उठाउँदै आएका यादवले यस महाधिवेशनमा सबै विद्यार्थीलाई आफ्नो उम्मेदवारीका पक्षमा सहयोग गर्न अपिल गरेका छन्। उनले आफू निर्वाचित भएमा विद्यार्थीका आधारभूत अधिकारको रक्षा गर्दै निरन्तर संघर्ष गर्ने प्रतिबद्धता जनाएका छन्।
यादवले संगठनलाई बलियो बनाउन र लोकतान्त्रिक पद्धतिलाई निरन्तरता दिन आफ्नो उम्मेदवारी रहेको बताउँदै भने, “विद्यार्थी आन्दोलनबाटै देशमा आमूल परिवर्तन भएको छ। यस आन्दोलनकै कारण अहिलेको व्यवस्थाको स्थापना सम्भव भएको हो।”
उनले समाजवादी शिक्षाको आवश्यकतामा जोड दिँदै प्रयोगात्मक र सिर्जनात्मक शैक्षिक पद्धतिलाई अवलम्बन गर्ने योजना सार्वजनिक गरेका छन्। साथै, पार्टीलाई अगाडि बढाउन विद्यार्थीको महत्त्वपूर्ण भूमिका रहने बताउँदै, विद्यार्थी साथीहरूले आफ्नो मत यादवलाई दिएर विजयी गराउन आग्रह गरेका छन्।
अध्यक्षका प्रत्याशी यादवले सबै विद्यार्थीलाई संगठित गर्दै समाज परिवर्तनका लागि योगदान दिन संगठनलाई अझै मजबुत बनाउने प्रतिवद्धता जनाएका छन्।
