कैलालीको गौरिगङ्गा नगरपालिका वडा नं. १ माघी टोलमा रहेको श्री आधारभूत विद्यालयलाई जेभी फाउन्डेसनको सहयोगमा सरस्वती माताको मूर्ति र गजुर हस्तान्तरण गरिएको छ। यो कार्यक्रम विद्यालयका प्रधानाध्यापक गणेशबहादुर बुढाको अध्यक्षतामा सम्पन्न भएको थियो।
कार्यक्रमको सञ्चालन विद्यालयका शिक्षक रनि बुढाले गर्नुभएको थियो भने प्रमुख अतिथिका रूपमा जेभी फाउन्डेसनका प्रदेश सचिव करण साउद उपस्थित हुनुहुन्थ्यो। विशिष्ट अतिथिका रूपमा फाउन्डेसनकै प्रदेश सदस्य नरबहादुर बुढाले सहभागिता जनाउनुभएको थियो।
कार्यक्रममा स्वागत मन्तव्य विद्यालयकी शिक्षिका रञ्जिता ढुंगाना जोशीले राख्नुभएको थियो। प्रमुख अतिथि करण साउदले जेभी फाउन्डेसनको योगदानबारे चर्चा गर्दै समाजसेवा नै सबैभन्दा ठूलो धर्म भएको बताउनुभयो। उहाँले २०३५ सालमा स्थापना भएको जेभी फाउन्डेसनले देशका हरेक जिल्लामा सेवा गर्दै आएको स्मरण गराउँदै सामाजिक सेवामा निरन्तर सक्रिय रहिरहने प्रतिबद्धता व्यक्त गर्नुभयो।
कार्यक्रमका दौरान विद्यालय परिवारले जेभी फाउन्डेसनलाई सम्मान प्रदान गरेको थियो। विद्यालयका प्रधानाध्यापक गणेशबहादुर बुढाले फाउन्डेसनलाई धन्यवाद ज्ञापन गर्दै कार्यक्रमको समापन गर्नुभयो।
विद्यालय र समाजका लागि महत्वपूर्ण योगदान पुर्याएको भन्दै विद्यालयले जेभी फाउन्डेसनप्रति कृतज्ञता व्यक्त गरेको छ।
