धनगढी: चिसापानी केबलकारको शिलान्यास गर्न आरजु राणा देउवाको आगमन
नेपाली कांग्रेसकी नेतृ तथा परराष्ट्रमन्त्री शेरबहादुर देउवाकी पत्नी डा. आरजु राणा देउवा आज कैलालीको धनगढी आइपुगेकी छन्। डा. राणा देउवा कैलालीको चिसापानीमा निर्माण हुन लागेको केबलकार परियोजनाको शिलान्यासका लागि धनगढी आइपुगेकी हुन्।
झण्डै सात अर्ब रुपैयाँ लागतमा निर्माण हुने यो केबलकार परियोजनामा नेपाल उद्योग वाणिज्य महासंघका अध्यक्ष तथा आइएमई ग्रुपका अध्यक्ष चन्द्रप्रसाद ढकालको प्रमुख लगानी रहेको छ। यसअघि ढकालले चन्द्रागिरी, गैंडाकोट, र बुटवलमा केबलकार सञ्चालनमा ल्याइसकेका छन्। परियोजनामा जिल्ला समन्वय समिति कैलालीका पूर्व सभापति सूर्यबहादुर थापाको समेत लगानी रहेको जनाइएको छ। यो परियोजना एक वर्षभित्र सम्पन्न गर्ने लक्ष्य राखिएको छ।
प्रधानसेनापति सिग्देल र प्रचण्डको सुदूरपश्चिम यात्रा
यसैबीच, नेपाली सेनाका प्रधानसेनापति अशोक सिग्देल पनि आज सुदूरपश्चिम पुगेका छन्। हेलिकोप्टरमार्फत बिहान तेघरी पुगेका सिग्देल भोलि बैतडी, बझाङ, र डोटीको भ्रमणमा जाने कार्यतालिका रहेको छ।
यस्तै, नेकपा माओवादी केन्द्रका अध्यक्ष तथा पूर्वप्रधानमन्त्री पुष्पकमल दाहाल ‘प्रचण्ड’ भोलि शनिबार धनगढी आउने कार्यक्रम छ। उनी कञ्चनपुरको पुनर्वासमा आयोजित भ्रष्टाचार र बेथितिविरुद्धको खबरदारी सभालाई सम्बोधन गर्न आउने छन्। खबरदारी सभा पुनर्वास नगरपालिकाको टाउन बजारमा हुने जानकारी प्राप्त भएको छ। सभामा प्रचण्डसँगै उनकी छोरी गङ्गा दाहालको पनि उपस्थिति रहनेछ।
सभामा माओवादी केन्द्रले सरकारको भ्रष्टाचार र अनियमितता उजागर गर्दै नयाँ कार्यकर्तालाई पार्टीमा स्वागत गर्ने कार्यक्रमसमेत राखिएको छ।
