बझाङ : शनिबार हुने बझाङ प्रदेशसभा १ को उपनिर्वाचनमा १ हजार २४ जना प्रहरी परिचालन हुने भएका छन् । प्रहरीले मतदान केन्द्रमा हिंसात्मक, ध्वंसात्मक र अवाञ्छित गतिविधिको पूर्वसूचना प्राप्त भएमा बल प्रयोग गरिने जनाएको छ
यस्तै विभिन्न दलका समर्थकबिच आपसमा झै–झगडा तथा कुटपिट वा पत्र तहसनहस हुने अवस्था भएमा, मतदान केन्द्रमा आक्रोशित भीडबाट सशस्त्र आक्रमण हुने अवस्था भएमा, मतदानस्थल र मतदान केन्द्र कब्जामा लिएमा वा लिने प्रयास गरेमा, मतदाताहरुलाई मतदान गर्न जान अवरोध भएमा बल प्रयोग गर्ने सुरक्षा योजनामा उल्लेख छ ।
१५ गते इलाम २ मा प्रतिनिधिसभा र बझाङ १ मा प्रदेशसभा सदस्यको उपनिर्वाचन हुन लागेको हो । केन्द्रीय प्रहरी प्रवक्ता भीमप्रसाद ढकालले बझाङमा ३१ मतदान केन्द्र सामान्य, ३० संवेदनशील र ३२ अतिसंवेदनशील रहेका बताए । उनका अनुसार, इलाममा ७१ मतदान केन्द्र सामान्य, ४१ संवेदनशील र ३७ अतिसंवेदनशील छन् । ती केन्द्रमा १ हजार ३६३ जनशक्ति परिचालन गरिँदै छ ।
