बझाङ : बझाङका कृषकहरुको लागि ३ दिने तालिम सञ्चालन गरिएको छ । प्रधानमन्त्री कृषि आधुनिकीकरण परियोजना, कार्यान्वयन इकाई बझाङको आयोजनामा उन्नत प्रविधी, प्राथामिक प्रशोधन, पोष्ट हार्भेष्ट, क्षती न्यूनिकरण तथा कृषि यान्त्रिकरण सम्बन्धी तालिम सञ्चालन गरिएको हो । सदरमुकाम चैनपुरस्थित जिल्ला समन्वय समितीको सभाहलमा आज आइतबार एक औपचारिक कार्यक्रमका बिच तालिमको उद्धघाटन गरिएको छ ।
उक्त कार्यक्रममा उपस्थित कृषकलाई कृषिमा आधारित अर्थतन्त्रबाट कृषिजन्य उद्योगमा रुपान्तरित आधुनिक, व्यवसायीक, दिगो एवं आत्मनिर्भर कृषि क्षेत्रको विकास गर्ने लगाएतका विषयमा प्रशिक्षण गरिने कार्यालय प्रमुख चरित्र नारायण यादवले बताउनुभयो । उक्त तालिम आउँदो मंगलबारसम्म चल्ने भएको छ । तालिममा जिल्लाका सबै स्थानिय तहबाट करीब ५० जना कृषकको सहभागिता रहेको छ । कार्यक्रममा बोल्दै जिल्ला समन्वय समिती प्रमुख नर बहादुर बोहोराले कृषकले तीन दिनसम्म सिकेका कुरा आफुले मात्र नभई गाउघरमा रहेका अन्य कुषकलाई पनि सिकाउनुपर्ने बताउनुभयो । उहाँले कृषि आधुनिकतामा जोड दिदै स्थानिय सरकार, कृषि ज्ञान केन्द्र र आलुजोनले कृषकले उत्पादन गरेका कृषि उपजहरु बजारीकरणका साथै सहजिकरणको जिम्मा लिन आवश्यक रहेको बताउनुभयो ।
कृषिको आधुनिकरण र व्यवसायिकरणका लागि बिशिष्टकृत कृषि क्षेत्रहरुको विकास गर्ने उद्येश्य सहित जिल्लामा सञ्चालित प्रधानमन्त्री कृषि आधुनिकीकरण परियोजनाले जिल्लामा आलुखेती, दहलन बाली (सिमि), सुन्तलाजात, जस्ता बालिहरुलाई प्राथमिकता दिएको छ । जिल्लाका कृषि क्षेत्रमा निर्भर रहेका किसानहरुलाइ बीउ उपलब्ध गराउने, आलुखेती प्रबिधि तालिम दिईने, बिसादी, अनुदान, साना सिचाइ मर्मत गर्ने लगायतका सेवाहरु प्रधानमन्त्री कृषि आधुनिकरण परियोजना कार्यान्वयन ईकाई बझाङले दिंदै आएको छ ।
प्रधानमन्त्री कृषि आधुनिकीकरण परियोजना कार्यान्वयन एकाइका प्रमुख चरित्र नारायण यादबको अध्यक्षतामा सञ्चालन भएको उद्धघाटन कार्यक्रममा प्रमुख अतिथी जिल्ला समन्वय समितीका प्रमुख नर बहादुर बोहरा रहनुभएको थियो । बिशिष्ट अतिथीमा सहायक प्रमुख जिल्ला अधिकारी सत्य कुमारी जोशी रहनुभएको थियो । कार्यक्रममा आलुजोनका कर्मचारीहरु, कृषि ज्ञान केन्द्रका कृषि अधिकृत मदनराज जोशी, कृषकहरु, पत्रकार लगाएत सरोकारवालाको सहभागीता रहेको थियो । कार्यक्रमको सञ्चालन प्रधानमन्त्री कृषि आधुनिकीकरण परियोजना कार्यान्वयन एकाईका प्राविधिक सहायक कुम्भराज रोकायाले गर्नुभएको थियो ।
