काठमाडौं – औषधी व्यवस्था विभागका महानिर्देशक नारायण ढकालले मनोमानी तरिकाले कर्मचारी सरुवा गरेका छन् ।
अधिकृतस्तरका कर्मचारीको फेरबदल स्वास्थ्य मन्त्रालयले गर्ने भएतापनि उनले कर्मचारीको लिष्ट बनाएर मन्त्रीलाई दबाब दिएर विभागका कर्मचारीको सरुवा गर्न लगाएका हुन् ।
नियमित सरुवाको समय नै नभएकाहरुलाई पनि ढकालकै दबाबमा मन्त्रालयले सरुवा गरेको मन्त्रालय स्रोत बताउँछ । ‘ढकाल सरको लिष्टमा एउटा पनि तलमाथि नभई सरुवा भएको छ,’ मन्त्रालय स्रोतले भन्यो, ‘यो नियमित खालको सरुवा होइन् ।’ औषधी व्यवस्था विभाग स्रोतका अनुसार ढकालले आफूखुसी गर्ने काममा प्रश्न उठाउने र गुपचुप रुपमा ऐन परिवर्तनको मस्यौदा तयार गरिरहेको विषयमा चासो देखाउने कर्मचारीलाई छानी—छानी जिम्मेवारी हेरफेर र सरुवा गरेका छन् ।
लोकसेवाबाट नाम निकालेर वीर अस्पतालमा पदस्थापन भएको तीन महिना पनि नपुगेका फार्मेसी अधिकृत अनुप विष्टलाई उनले विभागमा तानेका छन् ।
वीरमा जान पहिलेदेखि नै रुची राखेका मानबहादुर महरालाई पठाएका छन् । त्यसैगरी, कोशी प्रदेशबाट एक वर्षअघि औषधी व्यवस्था विभाग सरुवा भएका संजीव कट्टेललाई स्वास्थ्य सेवा विभाग पठाएका छन् ।
उनको ठाउँमा स्वास्थ्य सेवा विभागबाट निशा पराजुलीलाई ल्याइएको छ । पराजुली लोकसेवाबाट नाम निकालेर विभागमा पदस्थापन भएर कार्यभार सम्हालेको एक वर्ष मात्रै भएको छ । सामान्यतयाः सुरुको पदस्थापन भएको दुई वर्षसम्म कर्मचारीलाई एक ठाउँबाट अर्को ठाउँमा सरुवा गरिदैन् ।
कर्मचारीहरु पनि कम्तीमा २ वर्ष एक ठाउँमा रहेर काम गर्न चाहन्छन् । महानिर्देशक ढकालले आफूलाई मन नपरेका कर्मचारीलाई अवधि नै नपुगी सरुवा गराएका छन् ।
उनले आफूले भनेअनुसार खुरुखुरु काम गर्ने निकट कर्मचारीलाई भने ७÷८ वर्षदेखि विभागमै काखी च्यापेर राखेका छन् । केही समयअघि वीर अस्पतालबाट कार्वाहीमा परेर विराटनगर सरुवा भएका श्याम मण्डललाई औषधी व्यवस्था विभागमै काजमा ल्याएका छन् ।
त्यसैगरी, औषधी व्यवस्था विभाग विराटनगरका निमित्त प्रमुख टेकेन्द्र मिश्रलाई औषधी व्यवस्था विभाग तानिएको छ भने औषधी व्यवस्था विभागका निकेश श्रेष्ठलाई विराटनगर पठाइएको छ । त्यस्तै, विभागबाट चतुर्भुज धनाडीलाई डडेल्धुरा पठाइएको छ । डडेल्धुराका विवेक श्रेष्ठलाई वीर अस्पताल र सर्फराज अहमदलाई वीरगञ्जबाट औषधी व्यवस्था विभाग ल्याइएको छ । -हेल्थआवजबाट
