काठमाडौं- नेपाल प्रिमियर लिग (एनपीएल) को तेस्रो संस्करणमा सुदूरपश्चिम रोयल्सले पहिलो जित दर्ता गरेको छ। त्रिवि क्रिकेट मैदानमा बुधबार भएको खेलमा पोखरा एभेन्जर्सलाई ६ विकेटले हराउँदै सुदूरपश्चिमले प्रतियोगितामा जितको खाता खोलेको हो।
पोखराले दिएको १४६ रनको लक्ष्य सुदूरपश्चिमले १६.५ ओभरमा चार विकेटको क्षतिमा पूरा गर्यो। सुदूरपश्चिमको जितमा कप्तान दीपेन्द्रसिंह ऐरीले उत्कृष्ट ब्याटिङ गर्दै ३६ बलमा ५१ रन बनाए। इशान पाण्डेले ३७ र ब्रान्डन म्याकमुलेनले २२ रनको योगदान दिए।
पोखराका धनञ्जय लक्षण, मेहदी हसन र साकिब अल हसनले समान एक विकेट लिए।
यसअघि टस हारेर पहिले ब्याटिङ गरेको पोखराले निर्धारित २० ओभरमा सात विकेट गुमाउँदै १४५ रन बनाएको थियो। पोखराका अर्जुन घर्तीले अविजित ४० रन बनाए। उनले २५ बलको सामना गरे। मेहदी हसनले ३२, कप्तान कुशल भुर्तेलले २१, साकिब अल हसनले १४ र धनञ्जय लक्षणले ११ रन जोडे।
सुदूरपश्चिमका अनिल खरेलले तीन ओभरमा तीन विकेट लिँदै पोखराको ब्याटिङ दबाबमा राखे। हेमन्त धामी, स्कट कुगेलेइन र कप्तान ऐरीले समान एक विकेट लिए।
यसअघि प्रतियोगिताको उद्घाटन खेलमा सुदूरपश्चिम लुम्बिनी लायन्ससँग सात विकेटले पराजित भएको थियो। दोस्रो खेलमा जित निकाल्दै टोलीले प्रतियोगितामा पुनरागमन गरेको छ।
एनपीएलअन्तर्गत बिहीबार दुई खेल हुनेछन्। पहिलो खेलमा दिउँसो १२ः३० बजे जनकपुर बोल्ट्स र काठमाण्डु गोर्खाज भिड्नेछन्। दोस्रो खेलमा साँझ ५ बजे विराटनगर किंग्स र कर्णाली याक्सबीच प्रतिस्पर्धा हुनेछ।
प्रतियोगितामा सुदूरपश्चिम र लुम्बिनीसहित विराटनगर किंग्स, चितवन राइनोज, जनकपुर बोल्ट्स, कर्णाली याक्स, काठमाण्डु गोर्खाज र पोखरा एभेन्जर्स गरी आठ टोली सहभागी छन्। तेस्रो संस्करणको एनपीएल आगामी मङ्सिर ५ गतेसम्म सञ्चालन हुनेछ।
