बझाङ- बझाङको छबिसपाथिभेरा गाउँपालिका-१ भाँडे बजारमा गएराति भएको आगलागीबाट दुई वटा किराना पसल पूर्णरूपमा जलेर नष्ट भएका छन्।
गएराति करिब २ः३० बजेतिर विद्युत् तार सर्ट भई आगलागी भएको हो। आगलागीबाट उत्तम खातीले सञ्चालन गरेको कुले कालिका किराना पसल र मुकेश कठायतले सञ्चालन गरेको महेश किराना पसल पूर्णरूपमा ध्वस्त भएका छन्।
आगलागीका कारण दुवै पसलभित्र रहेका खाद्यान्न, तथा अन्य व्यापारिक सामग्री जलेर नष्ट भएको स्थानीयले बताएका छन्।
कुले कालिका किराना पसलका सञ्चालक उत्तम खातीले आफू राति सुतिरहेको अवस्थामा एक्कासि आगलागी भएको थाहा पाएको बताए। “आगोले पसल घेरेको देखेपछि ज्यान जोगाउन मात्र सफल भएँ, तर पसलभित्र रहेका सामान बचाउन सकिनँ,” उनले दुःख व्यक्त गर्दै भने।
खातीका अनुसार आगलागीबाट आफ्नो पसलमा मात्रै १५ लाख रुपैयाँभन्दा बढीको क्षति भएको छ। यस्तै मुकेश कठायतले सञ्चालन गरेको महेश किराना पसल पनि पूर्णरूपमा जलेर नष्ट भएको छ। कठायतले आगलागीबाट ६ लाख रुपैयाँभन्दा बढीको क्षति भएको बताएका छन्।
रातिको समय भएकाले आगो नियन्त्रणमा ल्याउन कठिन भएको स्थानीयको भनाइ छ। आगलागीबाट मानवीय क्षति भने नभएको जनाइएको छ।
अव्यवस्थित विद्युत् लाइन बिस्तारका कारण आगलागीका घटना घट्दै गएका छन् । बारम्बार यस्ता घटना दोहोरिँदा पनि समस्या समाधानतर्फ नेपाल विद्युत् प्राधिकरणको प्रभावकारी पहल देखिदैन । समयमै विद्युत् लाइनको मर्मत, व्यवस्थापन र स्तरोन्नति नगरिए यस्ता दुर्घटना अझ बढ्न सक्ने देखिन्छ ।
