धनगढी, कैलाली — नयाँ वर्ष २०८३ को अवसर पारेर रोयल मेडिसिन डिस्टृब्युटर्स प्रा. लि. ले आफ्नो पाँचौँ वार्षिकोत्सव भव्य रूपमा सम्पन्न गरेको छ।
कम्पनीले नयाँ वर्षको शुभकामना व्यक्त गर्दै आफ्ना सम्पूर्ण समर्थक, ग्राहक तथा शुभेच्छुकहरूलाई हार्दिक धन्यवाद ज्ञापन गरेको छ। कम्पनीका अनुसार, “तपाईंहरूको साथ, सहयोग र विश्वासले आज हामी यो सफलताको चरणमा पुगेका छौँ।”
वार्षिकोत्सवको अवसरमा धनगढी क्षेत्रका औषधि व्यवसायीहरूसँग आपसी सहकार्य, अनुभव आदानप्रदान तथा सुदृढ सम्बन्ध निर्माण गर्ने उद्देश्यले विशेष कार्यक्रम आयोजना गरिएको थियो।
यसै अवसरमा सामाजिक उत्तरदायित्व अन्तर्गत आमाको माया छात्रावास लाई खाद्यान्न सामग्री सहयोग गरिएको छ। कम्पनीका सञ्चालक फार्मासिस्ट बिनेश कठरिया ले समाजप्रति आफ्नो दायित्व बोध गर्दै यस्ता सहयोग कार्यक्रमलाई आगामी दिनहरूमा समेत निरन्तरता दिने बताएका छन्।
उनका अनुसार, रोयल मेडिसिन डिस्टृब्युटर्स प्रा. लि. ले अत्यावश्यक जीवनरक्षक औषधिहरू — जस्तै ICU, NICU तथा क्रिटिकल केयर तथा इमर्जेन्सी प्रयोगका मेडिसिनहरू — सहज रूपमा उपलब्ध गराउँदै आएको छ। साथै, विभिन्न भ्याक्सिनहरूलाई उचित तापक्रममा सुरक्षित भण्डारण (कोल्ड चेन म्यानेजमेन्ट) गरी बिरामी तथा उपभोक्तालाई गुणस्तरीय सेवा प्रदान गर्ने लक्ष्यका साथ कम्पनी अगाडि बढिरहेको छ।
कार्यक्रममा बोल्दै नेपाल फर्मास्युटिकल एसोसिएसनका सचिव महाओम राज जोशी ले सुदूरपश्चिम जस्तो भौगोलिक रूपमा चुनौतीपूर्ण क्षेत्रमा इमर्जेन्सी तथा क्रिटिकल केयर सम्बन्धी औषधिहरूको सहज उपलब्धता सुनिश्चित गर्नु अत्यन्तै कठिन कार्य भए पनि रोयल मेडिसिन डिस्टृब्युटर्सले प्रदान गरेको सेवा प्रशंसनीय रहेको बताए। उनले स्वास्थ्य क्षेत्रको पहुँच विस्तार, गुणस्तरीय औषधिको सुनिश्चितता तथा सेवा प्रणाली सुदृढ बनाउन यस्ता संस्थाहरूको भूमिका महत्वपूर्ण हुने उल्लेख गरे।
साथै उनले आगामी दिनहरूमा स्वास्थ्य सेवा अझ प्रभावकारी बनाउन सरकारी तथा निजी क्षेत्रबीच सहकार्य आवश्यक रहेको र फार्मेसी क्षेत्रलाई थप व्यवस्थित, उत्तरदायी र जनमुखी बनाउन सबै पक्षको योगदान आवश्यक रहेको धारणा व्यक्त गरे।
कम्पनीले “सेवामा समर्पण, स्वास्थ्यमा योगदान” भन्ने मूल नारालाई आत्मसात गर्दै आगामी दिनहरूमा अझ उत्कृष्ट सेवा दिने प्रतिबद्धता जनाएको छ। नयाँ वर्षसँगै नयाँ संकल्प लिँदै कम्पनीले सेवा विस्तार, गुणस्तर सुधार तथा स्वास्थ्य क्षेत्रमा थप योगदान पुर्याउने लक्ष्य अघि सारेको छ।
