काठमाडौं-देशभर डेंगु संक्रमितको संख्या पाँच हजार नजिक पुगेको छ। इपिडिमियोलोजी तथा सरुवा रोग नियन्त्रण महाशाखाका किटजन्य रोग शाखा प्रमुख डा. गोकर्णप्रसाद दाहालका अनुसार हालसम्म ४ हजार ८१४ जनामा संक्रमण पुष्टि भएको छ।
डोल्पा, हुम्ला र मनाङबाहेक सबै जिल्लामा संक्रमण देखिएको छ। डेंगुका कारण अहिलेसम्म दुईजनाको मृत्यु भइसकेको छ।
डा. दाहालले वर्षा रोकिँदै गएर जाडो सुरु हुने क्रमसँगै डेंगुको जोखिम घट्दै जाने विश्वास व्यक्त गर्नुभयो।
ताजा तथ्यांकअनुसार कोशी प्रदेशमा ७१४, मधेशमा ९५, बागमतीमा १ हजार ६४, गण्डकीमा १ हजार २७३, लुम्बिनीमा ८४३, कर्णालीमा २७० र सुदूरपश्चिममा ५५५ जनामा डेंगु संक्रमण पुष्टि भएको छ।
