धनगढी, भदौ २२ ।
चुरे गाउँपालिकाले २२औं निजामती सेवा दिवस २०८२ विविध कार्यक्रमसहित मनाएको छ।
दिवसको अवसरमा बिहान कार्यालय परिसर सरसफाइ गरिएको थियो भने दिउँसो २ बजेदेखि कर्मचारी मैत्री ब्याडमिन्टन प्रतियोगिता सञ्चालन गरिएको थियो। प्रतियोगितामा पालिकाअन्तर्गतका कर्मचारीहरुबाट नौ टिम दर्ता भएका थिए। लिग चरणमा सम्पन्न खेल अन्तर्गत उत्कृष्ट प्रदर्शन गर्ने टिमलाई सम्मान गरिएको हो।
प्रतियोगितामा टिम दरी झरनाका दिपेन्द्र मलासी र दीपक कार्की पहिलो स्थान हासिल गर्दै विजेता बने। टिम कम्पासे धुराका दयानन्द जोशी र प्रेम बोहरा दोस्रो स्थानमा रहँदा, टिम गर्भादरबारका नरेन्द्र बिरकट्टामगर र पुस्कर अर्खालीमगर तेस्रो स्थानमा रहे। त्यस्तै, टिम ठुलीखालीका धर्मराज भट्ट र भुवन आचार्यले सान्त्वना स्थान प्राप्त गरेका छन्।
विजेताहरुलाई प्रमाणपत्र, ट्रफी तथा नगद पुरस्कार सहित सम्मान गरिएको थियो।
कार्यक्रम चुरे गाउँपालिकाका नि. प्रमुख प्रशासकीय अधिकृत धर्मराज भट्टको अध्यक्षतामा सम्पन्न भएको हो। कार्यक्रममा गाउँपालिका अध्यक्ष चक्र बहादुर बोगटी प्रमुख अतिथि तथा उपाध्यक्ष धना देवी थापा विशिष्ट अतिथि रहनु भएको थियो। कार्यक्रमको सञ्चालन जनस्वास्थ्य निरीक्षक विक्रम बहादुर बोहराले गरेका थिए।
