बझाङ- चार वर्षअघि बाढीले बगाएको झुलुङ्गे पुल पुनः निर्माण गरिएको छ। केदारस्यूँ गाउँपालिकाको देउरा र थलारा गाउँपालिकाको रेगम जोड्ने सेती नदीमाथिको उक्त पुल पुनःनिर्माण गरिएको हो।
२०७८ असोज ३१ देखि कात्तिक ३ गतेसम्म परेको अविरल वर्षाका कारण आएको बाढीले पुल बगाएपछि स्थानीयले झण्डै चार वर्ष सास्ती भोग्नुपरेको थियो। पुल बग्दा थलारा गाउँपालिका–१ र २ का सबै गाउँसँगै डोटी जिल्लाका केही बस्तीका बासिन्दा समेत आवतजावतमा समस्यामा परेका थिए।
पुल नभएपछि रेगम, पिपलकोट, चुथी, बगडा, मोरायल, खरायल, थापागाँउ, तेलिमाडु लगायतका गाउँका स्थानीयलाई उपभोग्य सामान किन्न, बिरामीलाई स्वास्थ्य संस्थामा लैजान र विद्यार्थीलाई विद्यालय पुग्न समेत कठिनाइ हुने गरेको थियो। आपतकालीन रूपमा दुवै पालिकाले हिउँदमा अस्थायी काठेपुल बनाएर आवतजावतलाई सहज बनाउने प्रयास गरे पनि बर्खामा नदीमा पानी बढ्दा पुल बग्ने भएकाले समस्या दोहोरिने गरेको थियो।
पुनःनिर्माणका लागि २०७९ फागुन १९ गते स्थानीय पूर्वाधार विकास आयोजना कार्यालय धनगढीसँग डडेल्धुराको देवभूमि कन्स्ट्रक्सन प्रा.लि. ले १ करोड ४९ लाख रुपैयाँमा ठेक्का सम्झौता गरेको थियो। सम्झौताअनुसार २०८१ भदौ १८ गतेभित्र पुल निर्माण सक्नुपर्ने भए पनि कम्पनीका प्रबन्ध निर्देशक डम्बरदत्त भट्ट को निधन र भुक्तानी ढिलाइका कारण निर्माण कार्य निर्धारित समयमा सम्पन्न हुन सकेन।
२०७९ फागुन २२ गते लोकसेवा आयोगका अध्यक्ष माधव प्रसाद रेग्मी र पूर्वाधार विकास प्रमुख इन्जिनियर महेश्वर घिमिरेको उपस्थितिमा पुलको शिलान्यास गरिएको थियो भने २०८० चैत्र २ गते केदारस्यूँ गाउँपालिका अध्यक्ष गणेशबहादुर बोहरा र थलारा गाउँपालिका अध्यक्ष प्रकाश बहादुर रोकायालगायत जनप्रतिनिधिले पुनःशिलान्यास गरेका थिए।
हाल पुल निर्माण अन्तिम चरणमा पुगेको निर्माण कम्पनीका प्रतिनिधि रामबहादुर शाहीले बताए । उनले भने सबै कार्य सकिएको छ थोरै तारजाली तथा बोल्डमा रङ लगाउन बाँकी छ, भोलि अर्थात् भदौ १२ गतेसम्म काम सम्पन्न हुन्छ । यही भदौ २२ गते लोकसेवा आयोगका अध्यक्ष माधव प्रसाद रेग्मीले पुलको उद्घाटन गर्ने कार्यक्रम तय गरिएको उनको भनाइ छ।
लामो प्रतीक्षापछि पुनःनिर्माण भएको पुलले आवतजावतमा सहजता ल्याउने भन्दै स्थानीयमा खुशी छाएको छ ।
Advertisement
