समीर कठायत, बझाङ- राष्ट्रिय विभूति मानवतावादी राजा जयपृथ्वी बहादुर सिंहको १४९औं जन्मजयन्तीको अवसरमा छबिसपाथिभेरा गाउँपालिकाले आयोजना गरेको माध्यमिक विद्यालयस्तरीय भलिबल, नृत्य तथा हाजिरीजवाफ प्रतियोगिता सम्पन्न भएको छ।
जयपृथ्वीनगर मेल्लेखस्थित सत्यवादी माध्यमिक विद्यालयमा सम्पन्न प्रतियोगितामा छात्र भलिबलतर्फ बान्निचौर साधारण तथा प्राविधिक माध्यमिक विद्यालय विजयी बन्दै प्रथम स्थान हासिल गरेको छ । द्वितीय सत्यवादी माध्यमिक विद्यालय जयपृथ्वीनगर मेल्लेख र शान्ति माध्यमिक विद्यालय चौघानपाटा तृतीय भएको छ ।
त्यस्तै छात्रा भलिबलतर्फ पनि बान्निचौर साधारण तथा प्राविधिक मा.वि.ले प्रथम स्थान हात पारेको छ भने सत्यवादी मा.वि. जयपृथ्वीनगर मेल्लेख दितीय र जनप्रिय मा.वि. बगरगाउँ तृतीय भए।
हाजिरीजवाफ प्रतियोगितामा बाठपाली मा.वि. प्रथम, बान्निचौर मा.वि. दितीय र थलारा मा.वि. तृतीय स्थानमा रहे। नृत्य प्रतियोगितामा भने लक्ष्मी आधारभूत विद्यालय पितडगडा प्रथम, सत्यवादी मा.वि. द्वितीय र थलारा मा.वि. तृतीय भएका छन् ।
छात्र भलिबल प्रथमलाई रु २० हजार , द्वितीयले ११ हजार र तृतीयले ७ हजार पुरस्कार प्राप्त गरेका छन् ।त्यस्तै छात्रा भलिबल तर्फ प्रथमले १५ हजार , द्वितीयले ९ हजार र तृतीयले ७ हजार पुरस्कार प्रदान गरिएको आयोजकले जनाएको छ ।
