बझाङ- बझाङको केदारस्यूँ गाउँपालिकाका दुई सामुदायिक विद्यालयलाई सुविधा सम्पन्न शौचालय हस्तान्तरण गरिएको छ। प्रगतिशील युवा समाज र वर्ल्ड भिजन इन्टरनेसनल नेपालको सहकार्यमा केदारस्यूँ गाउँपालिका–३ को केदार आधारभूत विद्यालय र वडा नं. ६ को भूमिदेव आधारभूत विद्यालयमा शौचालय निर्माण गरिएको हो।
करिब १५ लाख रुपैयाँ लागतमा बनेका शौचालय मंगलबार एक कार्यक्रमबीच प्रगतिशील युवा समाजका अध्यक्ष रमेश केसीले गाउँपालिकाकी उपाध्यक्ष मनिषा धामीलाई हस्तान्तरण गरेका हुन्।
शौचालय हस्तान्तरण कार्यक्रमको अवसरमा अध्यक्ष केसीले दुर्गम विद्यालयका बालबालिकाको स्वास्थ्य र सरसफाइलाई प्राथमिकतामा राखी सुविधा सम्पन्न संरचना निर्माण गरिएको बताए। उपाध्यक्ष धामीले शौचालय बनेपछि विद्यार्थीको स्वास्थ्य, उपस्थिती र अध्ययन वातावरणमा सकारात्मक प्रभाव पर्ने विश्वास व्यक्त गरिन्।
Advertisement
