काठमाडौँ- हाल देशभर मनसुनी वायुको प्रभाव सक्रिय रहेको मौसम पूर्वानुमान महाशाखाले जनाएको छ। मनसुनको न्यून चापीय रेखा सरदर स्थानको आसपासमा अवस्थित रहेकाले मौसममा व्यापक परिवर्तन देखिएको हो।
महाशाखाका अनुसार हाल बागमती, गण्डकी, कर्णाली र सुदूरपश्चिम प्रदेशमा सामान्य बदली रहेको छ भने अन्य प्रदेशहरूमा आंशिक बदलीको अवस्था छ। कोशी, बागमती, गण्डकी, लुम्बिनी र सुदूरपश्चिम प्रदेशका थोरै स्थानहरूमा हल्का वर्षा भइरहेको जानकारी प्राप्त भएको छ।
दिउँसोको पूर्वानुमान अनुसार, देशभर सामान्य बदली रहनेछ। विशेषगरी सुदूरपश्चिम प्रदेशसहित देशका पहाडी भूभागका धेरै स्थानहरूमा र तराईका थोरै स्थानहरूमा चट्याङसहित मध्यम वर्षाको सम्भावना रहेको छ।
रातिको अवस्थामा, पहाडी भूभागमा सामान्य बदली रहनेछ भने तराईमा आंशिक बदली रहने अनुमान गरिएको छ। यस्तै, देशका पहाडी क्षेत्रका थोरै स्थानहरूमा र तराईका एक–दुई स्थानमा चट्याङसहित मध्यम वर्षा हुन सक्ने सम्भावना रहेको छ।
गण्डकी प्रदेशका पहाडी भागमा भने एक–दुई स्थानमा भारी वर्षाको सम्भावना रहेकोले सतर्कता अपनाउन मौसम पूर्वानुमान महाशाखाले अनुरोध गरेको छ।
