काठमाडौं- मनसुनी वायुको प्रभावका कारण कोशी, मधेश, बागमती र सुदूरपश्चिम प्रदेशमा सामान्य बदली रहँदा अन्य प्रदेशहरूमा आंशिक बदली भएको मौसम पूर्वानुमान महाशाखाले जनाएको छ।
कोशीका केही स्थान तथा मधेश, बागमती, गण्डकी र लुम्बिनी प्रदेशका एक–दुई स्थानमा हाल हल्का वर्षा भइरहेको छ।
महाशाखाका अनुसार सोमबार पनि देशभर आंशिकदेखि सामान्य बदली रहनेछ। विशेषगरी बागमती, गण्डकी प्रदेशलगायत देशका पहाडी भूभागका केही स्थानहरूमा मेघगर्जन, चट्याङसहित हल्कादेखि मध्यम वर्षाको सम्भावना रहेको छ। कोशी, बागमती र गण्डकी प्रदेशका एक–दुई स्थानमा भने भारी वर्षा हुने पूर्वानुमान छ।
यसका साथै देशका उच्च पहाडी तथा हिमाली भेगका केही स्थानहरूमा हल्का वर्षा र हिमपातको सम्भावना पनि रहेको महाशाखाले जनाएको छ।
वर्षाका कारण नदीहरूको जलस्तर बढ्ने, गग्रान बहाव, बाढी, पहिरो तथा भूक्षय जस्ता प्रकोपको सम्भावना रहेको हुँदा महाशाखाले जनस्वास्थ्य, कृषि, यातायात र दैनिक जनजीवनमा पर्ने सम्भावित जोखिमबाट बच्न आवश्यक सतर्कता अपनाउन आग्रह गरेको छ।
