धनगढी, २१ बैशाख — राष्ट्रिय स्वास्थ्यकर्मी महासंघ नेपाल, सुदूरपश्चिम प्रदेश समितिको दोस्रो अधिवेशन यही बैशाख २७ गते शनिबार धनगढीमा आयोजना हुने भएको छ। अधिवेशन नेकपा (एमाले) पार्टी कार्यालय, धनगढी कैलालीमा बिहान १० बजे सुरु हुने छ।
महासंघको प्रदेश कार्यसमितिले सबै जिल्ला कार्यसमिति अध्यक्षहरूलाई पत्र पठाउँदै प्रतिनिधिहरूसहित उपस्थित हुन आग्रह गरेको छ। विधानअनुसार प्रतिनिधिहरूको सहभागिता अनिवार्य रहने छ।
प्रदेश अध्यक्ष तप्त भण्डारीका अनुसार अधिवेशनको प्रमुख वक्ताका रूपमा नेकपा एमाले स्थायी कमिटी सदस्य तथा पूर्वमन्त्री माननीय कृष्णगोपाल श्रेष्ठको उपस्थिति रहनेछ। त्यस्तै, राष्ट्रिय स्वास्थ्यकर्मी महासंघका केन्द्रीय अध्यक्ष डा. झलक गौतमसहित संघका अन्य उच्च पदस्थ नेतृत्वहरू पनि सहभागी हुने कार्यक्रम रहेको छ।
कार्यक्रममा संगठनको विगत कार्यको समीक्षा, नयाँ नेतृत्व चयन, नीति निर्माण र भावी कार्ययोजनाका विषयमा विस्तृत छलफल हुने अपेक्षा गरिएको छ। साथै, स्वास्थ्यकर्मीहरूको अधिकार संरक्षण, पेशागत मर्यादा र सेवा क्षेत्रका चुनौतीबारे पनि व्यापक बहस हुने बताइएको छ।
अधिवेशनमा सुदूरपश्चिम प्रदेशका नौवटै जिल्लाबाट प्रतिनिधिहरूको उल्लेख्य उपस्थिति रहनेछ। समापनमा नयाँ प्रदेश नेतृत्व चयन र भावी रणनीति सार्वजनिक गरिनेछ।
