धनगढी, वैशाख १९ –१३६औं अन्तर्राष्ट्रिय श्रमिक दिवस (विश्व मजदुर दिवस) को अवसरमा नेपाल औषधि तथा बिक्री प्रतिनिधि सङ्घ धनगढी इकाइले बृहत रक्तदान कार्यक्रमको आयोजना गरेको छ। कार्यक्रम नेपाल रेडक्रस सोसाइटी, धनगढीको हलमा सम्पन्न भयो।
उक्त कार्यक्रम सङ्घका अध्यक्ष लक्ष्मण ठकुराठीको अध्यक्षतामा सम्पन्न भएको हो। कार्यक्रममा प्रमुख अतिथिका रूपमा नेपाल औषधि तथा बिक्री प्रतिनिधि सङ्घका केन्द्रीय उपाध्यक्ष मिन शाहको उपस्थिति थियो।
विशिष्ट अतिथिहरूमध्ये सङ्घका संस्थापक अध्यक्ष तथा पिन धनगढीका अध्यक्ष सन्तोष वर्णवाल, निवर्तमान अध्यक्ष दिनेशराज भट्ट, नेपाल औषधि व्यवसायी सङ्घ कैलालीका अध्यक्ष प्रेम बिसी, उपाध्यक्ष डम्मर ऐरी तथा नेपाल औषधि थोक व्यवसायी सङ्घ सुदूरपश्चिम कार्यसमिति सदस्य राजेन्द्र जोशी सहभागी थिए।
कार्यक्रममा श्रमिक दिवसको ऐतिहासिक पृष्ठभूमि, औषधि प्रतिनिधिहरूको योगदान, तथा रक्तदान जस्तो मानवीय कार्यमार्फत समाजसेवामा सक्रिय सहभागी बन्ने संस्कृतिबारे मन्तव्यहरू राखिएको थियो। वक्ताहरूले १३६औं विश्व मजदुर दिवसले सम्पूर्ण श्रमजीवी वर्गलाई हक, अधिकार र स्वतन्त्रताको रक्षार्थ एकतामा बाँध्ने प्रेरणा दिने विश्वास व्यक्त गरे।
त्यसैगरी, नेपालको संविधानले नागरिकहरूलाई रोजगारीको हक सुनिश्चित गर्नुका साथै श्रमिकलाई उचित पारिश्रमिक, समान अवसर तथा लैङ्गिक भेदभावविना काम गर्न सक्ने वातावरणको ग्यारेन्टी गरेको उल्लेख गरियो।
वक्ताहरूले स्वदेशी उत्पादनको प्रयोग, श्रमको सम्मान, स्वरोजगार, उचित पारिश्रमिक तथा सामाजिक सुरक्षाजस्ता श्रमिक अधिकारलाई सुदृढ बनाउन मजदुर दिवसले प्रेरणा दिइरहेको धारणा व्यक्त गरे।
‘आठ घण्टा काम, आठ घण्टा आराम, आठ घण्टा मनोरञ्जन’ भन्ने नारासहित सन् १८८६ मा अमेरिकाको शिकागोमा भएको श्रमिक आन्दोलनको स्मरण स्वरूप प्रत्येक वर्ष मे १ मा विश्वभर अन्तर्राष्ट्रिय श्रमिक दिवस मनाइन्छ। नेपालमा २००७ सालमा विराटनगरबाट सुरु भएको श्रमिक आन्दोलनपछिबाट श्रमिक अधिकारको लहर चलेको थियो। वि.सं. २०४६ सालको राजनीतिक परिवर्तनपछिबाट सरकारले मे १ तारिखलाई सार्वजनिक बिदाका रूपमा मान्यता दिएको हो।
रक्तदान कार्यक्रममा औषधि प्रतिनिधि, व्यवसायी, सामाजिक अभियन्ता तथा स्वयंसेवकहरूको उल्लेख्य सहभागिता रहेको थियो। आयोजक संस्थाले रक्तदाताहरूलाई प्रमाणपत्र प्रदान गर्दै आभार प्रकट गरेको छ।
