बझाङ — बुंगल नगरपालिकामा अटो रिक्साका भाडादर र व्यवस्थापनमा देखिएको लापरबाहीप्रति असन्तुष्टि जनाउँदै सहायक प्रमुख जिल्ला अधिकारी (सपजिअ) सत्यकुमारी जोशीले नगरपालिका प्रमुखलाई १५ दिनभित्र सुधार गर्न कडा चेतावनी दिनुभएको छ ।
बझाङ जिल्ला ट्राफिक प्रहरी कार्यालयको आयोजनामा आयोजित सडक सुरक्षा तथा ट्राफिक सचेतना कार्यक्रममा बोल्दै सपजिअ जोशीले अनियमित र मनपरी भाडा असुली तत्काल रोकिनुपर्ने बताउनुभयो।
“१५ दिनभित्र अटो भाडा दर तय गरी व्यवस्थित गर्नू,” उहाँले कडाइका साथ निर्देशन दिनुभयो, “नत्र कडा कानुनी कारवाहीको सामना गर्न तयार रहनुहोस्।”
बुंगल नगरपालिकाका मेयर जयबहादुर धामीसमक्ष प्रत्यक्ष रूपमा चेतावनी दिँदै जोशीले स्थानीय सरकार नै बेखबर बनेर नागरिकलाई सास्ती दिने प्रवृत्तिको अन्त्य हुनुपर्ने बताउनुभयो ।
कार्यक्रममा ट्राफिक प्रमुख विनोद विष्टले समेत भाडा, नम्बर प्लेट र मापसेसम्बन्धी नियम उल्लंघनमा कडाइका साथ कारवाही गरिने जानकारी गराउनुभएको थियो ।
स्थानीयवासी र सञ्चारकर्मीहरूले पनि अटो भाडा व्यवस्थापन र नियमन को माग गर्दै धेरैपटक ध्यानाकर्षण गराएका थिए। तर, बेवास्ता भएपछि प्रशासनले प्रत्यक्ष दबाब दिन थालेको हो ।
