बझाङ- बझाङको दुर्गाथलि, मष्टा र खप्तडछान्ना गाउँपालिकामा पालिका स्तरीय बालसञ्जालका प्रतिनिधिहरूलाई लक्षित गर्दै बालअधिकार र योजना निर्माणसम्बन्धी एकदिवसीय अभिमुखीकरण कार्यक्रम सम्पन्न भएको छ।
सशक्त महिला समृद्ध नेपाल’ कार्यक्रमअन्तर्गत आयोजित उक्त गोष्ठीमा बालबालिकाको अर्थपूर्ण सहभागिता, अधिकार, कर्तव्य, तथा समुदायमा उनीहरूको भूमिकाका विषयमा विस्तृत छलफल गरिएको थियो।
फिल्ड फेसिलिटेटर लक्ष्मण चलाउनेका अनुसार दुर्गाथलीमा ३५, मष्टामा ४५ र खप्तडछान्नामा ४० जनाको सहभागिता रहेको थियो। खप्तडछान्नामा उपाध्यक्ष विष्णु कुमार थापाको अध्यक्षतामा कार्यक्रम सञ्चालन भएको थियो।
बालबालिकाले समुदायमा भोगिरहेका समस्या, जोखिम र आवश्यकताको पहिचान गरी तिनीहरूको प्राथमिकिकरण गर्दै योजनाबद्ध ढंगले समाधान गर्न बालभेला मार्फत कार्यक्रम प्रस्ताव गर्ने अवधारणामा जोड दिइएको थियो।
कार्यक्रम युरोपियन युनियनको सहयोगमा, निड्स नेपालको आयोजना र युनिसेफ नेपालको सहकार्यमा सम्पन्न भएको हो। कार्यक्रमको सहजीकरण युनिसेफ नेपालका सामाजिक नीति अधिकृत प्रकाश आचार्यले गर्नुभएको थियो।
उपाध्यक्ष थापाले आगामी बजेटमा बालमैत्री कार्यक्रम समावेश गरिने प्रतिबद्धता व्यक्त गर्नुभयो।
