कैलाली, चैत २७ – लागु औषध कारोबार तथा प्रयोगमा संलग्न रहेको आशंकामा कैलाली जिल्लाका विभिन्न स्थानबाट प्रहरीले ५ ग्राम ६६० मिलिग्राम खैरो हेरोइन र ७२ थान प्रतिबन्धित ट्याब्लेटसहित १२ जनालाई पक्राउ गरेको छ।
जिल्ला प्रहरी कार्यालय, कैलालीका अनुसार २०७८ चैत २६ गते प्राप्त गोप्य सूचनाका आधारमा घोडाघोडी नगरपालिका–०१ सुखडस्थित गौरभ आचार्यको घरमा लागू औषध प्रयोग भइरहेको भन्ने सूचनाको आधारमा इलाका प्रहरी कार्यालय, सुखडबाट खटिएको टोलीले २५ वर्षीय गौरभ आचार्य, ३४ वर्षीय सुरेन्द्र श्रेष्ठ र २२ वर्षीय भिम बोहरालाई ३.५८ ग्राम खैरो हेरोइनसहित पक्राउ गरेको हो।
त्यस्तै, टिकापुर नगरपालिका–०९ स्थित खक्रौला चेकपोष्ट नजिक इलाका प्रहरी कार्यालय, टिकापुरको टोलीले १८ वर्षीय सन्तोष बिक र २३ वर्षीया बन्दना बिकलाई १.४२ ग्राम हेरोइनसहित नियन्त्रणमा लिएको छ।
धनगढी उपमहानगरपालिका–०६, ०७, ०९ र आसपासका क्षेत्रहरूमा खटिएको अपराध अनुसन्धान समूहले २२ वर्षीय विवेक राना, १८ वर्षीय आकाश राना, २२ वर्षीय भिम सुनार, २६ वर्षीय दिनेश बोहरा र २५ वर्षीय विशाल बोहरालाई ६६० मिलिग्राम हेरोइनसहित पक्राउ गरेको छ।
यसैगरी, बहुलिया र लागुऔषध नियन्त्रण ब्युरो शाखा कार्यालय धनगढीबाट खटिएको संयुक्त टोलीले उपमहानगरपालिका–१९ ललिपुरघाटबाट २८ वर्षीय रोहित बोगटी र २२ वर्षीय लोकेन्द्र खड्कालाई ७२ वटा प्रतिबन्धित ट्याब्लेटसहित पक्राउ गरेको हो।
प्रहरीका अनुसार पक्राउ परेकाहरूलाई लागुऔषध मुद्दामा कारबाहीका लागि हिरासतमा राखेर थप अनुसन्धान भइरहेको छ।
