धनगढी, चैत्र १५ – धनगढी उपमहानगरपालिका–३ मा सञ्चालित विवेक फिड इन्डष्ट्रिज प्रा.लि. मा आज दिउँसो १:०० बजे पानी बोइलर मेशिनबाट आगलागी भएको जिल्ला प्रहरी कार्यालय कैलालीले जनाएको छ। घटना भएलगत्तै अस्थायी प्रहरी पोष्ट चटकपुरबाट प्रहरी टोली खटिएको थियो। दमकल तथा स्थानीयको सहयोगमा १:३० बजे आगो पूर्ण रूपमा नियन्त्रणमा आएको थियो। आगलागीबाट उद्योगको मेसिन तथा १ ट्रक बराबरको दाउरा जलेर करिब १६/१७ लाख रुपैयाँ बराबरको क्षति भएको छ। तर, कुनै मानवीय तथा चौपाया क्षति नभएको प्रहरीले जनाएको छ।
यस्तै, भजनी नगरपालिका–७ पृथ्विपुर गौडीमा बेलुका ५:०० बजे मटरु यादवको कच्ची भान्साबाट हावाका कारण आगलागी भएको छ। घटनाको जानकारी पाएलगत्तै इलाका प्रहरी कार्यालय पृथ्विपुर र भजनीबाट प्रहरी टोली परिचालित भएको थियो। हावाका कारण आगो आसपासका ४/५ वटा कच्ची गोठ र गहुँबारीमा समेत फैलिएको छ। हालसम्म मानवीय तथा चौपाया क्षति नभएको र आगो निभाउने प्रयास जारी रहेको प्रहरीले जनाएको छ।
यसैबीच, जिल्ला प्रहरी कार्यालय कैलालीका सहप्रवक्ता प्रहरी निरीक्षक लोक राज जोशि का अनुसार दुबै घटनामा मानवीय क्षति नभए पनि ठूलो आर्थिक नोक्सानी भएको छ। उनले भने, “धनगढीमा भएको आगलागी करिब आधा घण्टामा नियन्त्रणमा ल्याइएको थियो भने भजनीमा भइरहेको आगलागी नियन्त्रणका लागि प्रहरी, स्थानीयवासी र दमकलको टोली जुटिरहेको छ।”
