काठमाडौं, नेपाल – नेपाल फार्मेसी संघले हालै औषधि व्यवस्था विभागद्वारा जारी गरिएको ‘Reserve Antibiotics’ सम्बन्धी सूचनाप्रति आपत्ति जनाउँदै, यसको कार्यान्वयनमा आवश्यक सुधार गर्न माग गरेको छ।
संघका अनुसार विभागले सार्वजनिक गरेको सूचना अस्पष्ट, आधिकारिकता बिहीन र आत्मघाती प्रवृत्तिको भएकोले यसले समुदायस्तरका फार्मेसी व्यवसायलाई अन्योलमा पार्ने खतरा रहेको छ। संघले विभागले औषधि वितरण प्रक्रियामा असहजता ल्याउने जुनसुकै निर्णयलाई समर्थन गर्न नसक्ने स्पष्ट पारेको छ।
नेपाल फार्मेसी संघले फार्मासिष्टहरूका हकहित र औषधि आपूर्तिको सन्तुलन कायम राख्नुपर्ने कुरामा जोड दिँदै, औषधि ऐन, २०३५ अनुरूप उचित ढंगबाट नीतिहरू लागू गर्न सरकारलाई आग्रह गरेको छ। संघले स्वास्थ्य सेवा प्रदायक संस्थाहरूसँग समेत छलफल गरी उचित नीति निर्माण गर्नुपर्नेमा जोड दिएको छ।
संघका महासचिव युवराज भुसालले हस्ताक्षर गरेको विज्ञप्तिमा औषधि वितरण प्रक्रियामा कुनैपनि एकपक्षीय निर्णयले समुदायस्तरमा असहजता ल्याउने र औषधिको सहज उपलब्धतामा अवरोध उत्पन्न गर्ने बताइएको छ।
नेपाल फार्मेसी संघले औषधि व्यवसायसँग सम्बन्धित कुनैपनि निर्णय अघि विभाग, व्यवसायी तथा सरोकारवालाबीच आवश्यक छलफल हुनुपर्नेमा जोड दिँदै, अन्यथा कानुनी प्रक्रिया अवलम्बन गर्ने चेतावनी समेत दिएको छ।
