काठमाडौं : किशोरावस्थाको स्वास्थ्य तथा महिनावारी व्यवस्थापनसम्बन्धी तीन दिने तालिमको तेस्रो समूह (batch) को समापन भव्य रूपमा सम्पन्न भएको छ। स्वास्थ्य शिक्षा, चेतना तथा अधिकार, नेपालको आर्थिक सहयोग तथा बागमती प्रदेश स्वास्थ्य तालिम केन्द्र को सहकार्यमा आयोजित उक्त तालिममा विभिन्न विद्यालयका स्कूल नर्सहरू सहभागी भएका थिए।
तालिमको समापन समारोहमा पूर्व संघिय मामिला तथा सामान्य प्रशासन मन्त्री भानुभक्त जोशी प्रमुख अतिथिका रूपमा उपस्थित थिए। उनले किशोर स्वास्थ्य तथा महिनावारी व्यवस्थापन सम्बन्धी यस्ता तालिमहरूलाई राष्ट्रिय स्तरमा विस्तार गर्नु आवश्यक रहेको उल्लेख गर्दै कार्यक्रमलाई अझ प्रभावकारी बनाउन सुझाव प्रस्तुत गरे।
हेयर नेपालका अध्यक्ष माधव जोशीले किशोर स्वास्थ्यका लागि स्कूल नर्सहरूको भूमिका महत्वपूर्ण रहेको बताउँदै राज्यले उनीहरूको दक्षता अभिवृद्धिमा विशेष ध्यान दिनुपर्ने आवश्यकता औँल्याए।
तालिमका प्रमुख प्रशिक्षक प्रा. डा. नर्बदा थापा ले यस कार्यक्रमले स्कूल नर्सहरूको ज्ञानको दायरा फराकिलो बनाएको बताइन्। शिक्षण विधि विज्ञ प्रा. डा. मन्दिरा शाही ले किशोर-किशोरी मनोविज्ञान तथा शिक्षण विधि सम्बन्धी प्रशिक्षण दिएकी थिइन्। साथै, स्वास्थ्य शिक्षा विज्ञ कृष्णबहादुर चन्द र कुञ्जप्रसाद जोशी ले किशोर स्वास्थ्य तथा सचेतनाका विविध पक्षबारे प्रशिक्षण प्रदान गरे।
समापन अवसरमा सहभागी स्कूल नर्सहरूलाई प्रमाणपत्र वितरण गरियो। हेयर नेपालले तालिम सफल बनाउन प्रत्यक्ष वा अप्रत्यक्ष रूपमा योगदान दिने सबैलाई धन्यवाद ज्ञापन गर्यो।
यो तालिम ८ समूहमा सञ्चालन गरिनेछ, जसअन्तर्गत बागमती प्रदेशका २०० जना स्कूल नर्सहरूलाई प्रशिक्षित गरिने लक्ष्य छ। आयोजकहरूका अनुसार नेपालभर यस्ता तालिमहरू विस्तार गर्न आवश्यक रहेको छ, जसले किशोर स्वास्थ्य प्रवर्द्धन, लैंगिक समानता तथा महिनावारी व्यवस्थापन सम्बन्धी कलङ्क हटाउने प्रयासलाई तीव्रता दिनेछ।
हेयर नेपाल ले भविष्यमा पनि किशोर स्वास्थ्य तथा महिनावारी व्यवस्थापन कार्यक्रमलाई थप प्रभावकारी बनाउँदै लैजाने प्रतिबद्धता जनाएको छ।
