धनगढी- पछिल्लो समयमा बाजुराका अधिकांश विद्यालयहरूले विद्यार्थीलाई विद्यालयमै तरकारी उत्पादन गर्न सिकाउँदै आएका छन्।
जिल्लाका विभिन्न विद्यालयमा बालबालिकाहरुलाई खुवाईदै आएको दिवा खाजा तथा खेलकुद सामग्री खरिद गर्न सहज हुनेगरी त्यहाँका विद्यालयले विद्यार्थीहरुलाई विद्यालयमै तरकारी उत्पादन गर्न सिकाउँदै आएका हुन्।
विद्यालयमा अध्यनरत विद्यार्थीहरूलाई पढाइसँगै तरकारी खेतीका बारे सिकाइने गरेको बुढीनन्दा नगरपालिका– ९ ढप्क स्थित सिद्धेश्वरी अनाथ जनजातीय तथा आवासीय आधारभूत विद्यालयका छात्रा छाँया गुरुङले जानकारी दिए।
‘विद्यालय वरीपरी धेरै जमिन छ। दुइ वर्षदेखि हामीले त्यो सबै जमिनमा तरकारी लगाउँदै आएको उनलेे भनिन् । ‘हामी सबै विद्यालयमा बस्छौं। विद्यालयमै खान सुत्नको राम्रो व्यवस्था छ। त्यसैले दिवा खाजा तथा बिहान बेलुकीको खाना सहज हुने गरी अहिले हामीले विद्यालयमै तरकारी उत्पादन गर्न थालेका हौ।’ यहाँको हिमाली, जगनाथ, स्वामिकार्तिक, बुढीनन्दा, बडिमालिका, गौमुल, बुढीगङ्गा, त्रिवेणी र खप्तड छेडेदह लगायतका अधिकाशं विद्यालयहरुले बालबालिकाहरुको पढाइ सगसँगै विद्यालयमा तरकारी लगाउँन सिकाउँदै आएका छन्।
बालबालिकालाई सानैदेखि आफैंले केही गर्न र उनीहरुको जीवनमा आइपर्ने हरेक बाधा अड्चनहरुलाई सहजरुपमा पार गर्न सकुन भन्ने उद्देश्यले पछिल्लो समय पढाइसँगै उनीहरुलाई तरकारी लगाउन तथा अन्य जिवनमा आवश्यक पर्ने विभिन्न सीप सिकाउने गरेको सिद्धेश्वरी अनाथ जनजातीय तथा आवासीय आधारभूत विद्यालयका प्राधानाध्यापक तुलाबहादुर रावतले बताए।
