धनगढी, कैलाली – जिल्ला प्रहरी कार्यालय कैलालीले विशेष अभियानअन्तर्गत ६ ग्राम ८८० मिलिग्राम खैरो हिरोइन सहित ६ जनालाई पक्राउ गरेको छ।
मिति २०८१।१०।५ गते, कैलालीको धनगढी उप-महानगरपालिका–२ स्थित एभरेष्ट सेभन गेष्ट हाउस नजिकै शंकास्पद गतिविधि भइरहेको भन्ने सूचनाका आधारमा जिल्ला प्रहरी कार्यालय कैलालीको विशेष टोलीले निगरानी बढाएको थियो। उक्त टोलीले धनगढी उप-महानगरपालिका–४ का ३१ वर्षीय एक पुरुषलाई खानतलासी गर्दा उनको साथबाट २०० मिलिग्राम खैरो हिरोइन बरामद गरिएको थियो।
यसपछि सोही स्थानबाट धनगढी उप-महानगरपालिका–४ का २३ वर्षीय अर्का युवकलाई नियन्त्रणमा लिइएको थियो। उनकै बयानका आधारमा थप अनुसन्धान गर्दै जाँदा प्रहरीले धनगढी–४ का २२ वर्षीय युवक सहित अन्य ३ जनालाई पक्राउ गरेको छ। पक्राउ परेका व्यक्तिहरूमध्ये एकजनाको साथबाट २१० मिलिग्राम, अर्काको साथबाट ८० मिलिग्राम, र अन्यबाट क्रमशः २८० मिलिग्राम, ३५० मिलिग्राम, र ५८० मिलिग्राम खैरो हिरोइन बरामद भएको छ।
जिल्ला प्रहरी कार्यालय कैलालीका प्रवक्ता तथा प्रहरी नायब उपरीक्षक (डीएसपी) कन्हैया सिंह बोहराका अनुसार पक्राउ परेका व्यक्तिहरूमाथि आवश्यक अनुसन्धान भइरहेको छ। लागू औषध कारोबार तथा प्रयोग नियन्त्रण गर्न प्रहरीले निरन्तर निगरानी बढाएको समेत डीएसपी बोहराले बताएका छन्।
