कैलाली, माघ २२ – जिल्ला प्रहरी कार्यालय कैलालीले विभिन्न स्थानबाट करिब ८ लाख २३ हजार रुपैयाँ बराबरको अवैध भन्सार छलीको सामान बरामद गरेको छ।
प्रहरीका अनुसार, माघ २१ गते राति ११:०० बजे इलाका प्रहरी कार्यालय भासु चौकीका प्रमुख वरिष्ठ नायब निरीक्षक केसवर पन्तको नेतृत्वमा गएको टोलीले गौरीगंगा नगरपालिका-२ आर्याटोल स्थित क्षेत्रमा शंका लागि चेकजाँच गर्दा ५ लाख ७५ हजार ८०० रुपैयाँ बराबरको अवैध मोबाइल सेट बरामद गरेको छ। बरामद गरिएका मोबाइलमा iPhone 11 (४ थान), iPhone XR (२ थान), iPhone 11 Pro (४ थान), iPhone 7 (२ थान) र iPhone केबल (१ थान) रहेका छन्।
यस्तै, प्रहरीले धनगढी-जुलानी सडकखण्डमा नियमित चेकजाँचको क्रममा विभिन्न खाद्य पदार्थ, प्रेस कुटका सामग्री, ओठमा लगाउने सौन्दर्य सामग्री तथा अन्य साइकलका पार्टपूर्जा बरामद गरेको छ। यी सामानहरूको मूल्य १ लाख ५६ हजार ५७० रुपैयाँ रहेको छ।
त्यसैगरी, भजनी नगरपालिकाको वडा नं. ५ स्थित कालिका सामुदायिक बन नजिकै अबैध रूपमा नेपाल भित्र्याइएका २ जोडी गोरु (४ वटा) समेत बरामद गरिएको छ। ती गोरुहरू भन्सार छली गरी भारतबाट ल्याइएको पाइएको प्रहरीले जनाएको छ। बरामद गोरुहरूको अनुमानित मूल्य १ लाख ९१ हजार रुपैयाँ रहेको छ।
प्रहरीले बरामद गरिएका सबै सामग्रीलाई आवश्यक कारबाहीका लागि सम्बन्धित निकायमा पठाइसकेको जनाएको छ। कैलाली प्रहरीका अनुसार, अवैध भन्सार छली रोकथाम गर्न सुरक्षा जाँचलाई अझ कडा पार्ने योजना बनाइएको छ।
