बझाँङ को खप्तड छान्ना गाउँपालिका वडा नम्बर ४ बास्काटियाकी फरक क्षमता भएकि किमा कुमारी रोकायालाई आर्थिक र खाद्यान्न सहयोग गरिएको छ।
कामना टेलिभिजनद्वारा संकलित आर्थिक सहयोगसहित खाद्यान्न सामग्री किमालाई हस्तान्तरण गरिएको हो। एक विशेष कार्यक्रममा दाल, चामल, साबुन, सोडा, नुन, ब्ल्याङ्केट, विस्तरा, लुगाकपडा लगायतका सामग्री प्रदान गरिएका थिए। यो सहयोग १५ हजार रुपैयाँ बराबरको थियो, जसमा समाधान समाजसेवा टाइगर टोली ब्याङ्गरोलका सोनु साउद र गोपाल खड्काको नेतृत्वमा रोहित फेन्सी पसल र शान्ति रूपा फेन्सी पसलको आर्थिक योगदान रहेको थियो।
खप्तड छान्ना गाउँपालिकाको भवनमा आयोजित कार्यक्रममा वडा नम्बर ४ का अध्यक्ष ईश्वर रोकायाले सामग्री हस्तान्तरण गर्नुभयो। कामना टेलिभिजनका पत्रकार उत्तमकुमार थापाको टोलीले सामग्री किमाकै हातमा पु¥याएको थियो।
किमा कुमारी रोकायाको कम्मरमुनिको भाग नचल्ने र दुवै खुट्टा अपांग भएकाले उहाँको स्थिति अत्यन्त नाजुक रहेको छ। आर्थिक अवस्था पनि कमजोर भएकाले यस्तो सहयोगले किमालाई ठूलो राहत दिएको स्थानीयहरूले बताएका छन्। सहायक संस्थाहरूलाई धन्यवाद दिँदै स्थानीयहरूले यस्ता कार्यले फरक क्षमताका व्यक्तिहरूलाई ठूलो मद्दत पुग्ने बताएका छन्।
