कैलाली : कैलालीको गौरीगंगा नगरपालिका-२ स्थित मालिका माध्यमिक विद्यालय चौमालामा अध्ययनरत १५ जना बालबालिकाहरूलाई युवा समाजसेवी हेमन्त राज जोशी (बाजे) को पहलमा शैक्षिक सामाग्री वितरण गरिएको छ।
आर्थिक अवस्था अत्यन्तै कमजोर भएका, विद्यालय जान नसक्ने, एकल परिवारका, जेहेन्दार र अनाथ बालबालिकाहरूलाई विद्यालय पोशाक, झोला, र स्टेसनरी सामाग्री प्रदान गरिएको हो।
कार्यक्रममा विद्यालय व्यवस्थापन समितिका अध्यक्ष तेज दियाकोटी, अमर माध्यमिक विद्यालयका व्यवस्थापन समितिका अध्यक्ष दान बहादुर कुँवर, समाजसेवी हेमन्त राज जोशी, मनोविमर्शकर्ता भगवती राई, विद्यालयका प्रधानाध्यापक रतन प्रसाद जैसी, शिक्षक-शिक्षिका, र विद्यार्थीहरूको उपस्थिति रहेको थियो।
सिबिन नेपालका कार्यालय प्रमुख हरिलाल चौधरीले न्यून आय भएका विद्यार्थीहरूलाई शैक्षिक सामाग्री वितरण गर्नाले उनीहरूको अध्ययनमा सहयोग पुग्ने विश्वास व्यक्त गरे।
पहलकर्ता हेमन्त राज जोशी (बाजे) ले प्राप्त शैक्षिक सामाग्रीबाट बालबालिकाहरू उत्साहित भएको र पढाइलाई निरन्तरता दिने प्रेरणा मिलेको जानकारी दिए।
कार्यक्रमको सञ्चालन शिक्षक तिलक साँउदले गरेका थिए भने स्वागत र धन्यवाद ज्ञापन प्रधानाध्यापक रतन प्रसाद जैसीले व्यक्त गरेका थिए।
यो अभियानले बालबालिकाहरूको शिक्षा सुनिश्चित गर्न समाजमा सकारात्मक सन्देश दिएको छ।
