माघ १२, बेलौरी (कञ्चनपुर):
ग्रामीण क्षेत्रका नागरिकलाई स्वास्थ्य सेवामा सहज पहुँच उपलब्ध गराउने उद्देश्यले कञ्चनपुरको बेलौरी नगरपालिका वडा नं. २ मा एकदिने निःशुल्क स्वास्थ्य शिविर सम्पन्न भएको छ। नोवा अस्पताल प्रा.लि., धनगढी र बेलौरी नगरपालिकाको संयुक्त सहकार्यमा आयोजित शिविरमा २०९ जना स्थानीय बासिन्दाले स्वास्थ्य सेवा लिएका छन्। सेवाग्राहीमध्ये १४४ जना महिला र ६५ जना पुरुष रहेका छन्। 
शिविरको उद्घाटन गर्दै बेलौरी नगरप्रमुख पोतिलाल चौधरीले यस्ता कार्यक्रमले ग्रामीण क्षेत्रमा स्वास्थ्य सेवा पुर्याउन महत्त्वपूर्ण योगदान पुर्याउने बताए। उहाँले आगामी दिनमा पनि यस्ता कार्यक्रमलाई निरन्तरता दिने प्रतिबद्धता जनाउनुभयो।
शिविरमा हाडजोर्नी तथा नसा रोग विशेषज्ञ डा. ललित चौधरी र विशेषज्ञ चिकित्सक डा. हरिस जोशीसहितको चिकित्सक टोलीले सेवा प्रदान गरेका थिए। घुँडाको दुखाइ, हाडजोर्नी समस्या, नशासम्बन्धी रोग तथा मेरुदण्डका समस्या भएका बिरामीहरूको जाँच र उपचारमा बायोरोस उपकरण प्रयोग गरिएको थियो। साथै, बिरामीहरूलाई निःशुल्क औषधि वितरण र परामर्श पनि प्रदान गरिएको थियो ।
नोभा अस्पतालका प्रशासन पदम राज भट्टका अनुसार, शिविरमा चेकजाँच गराइएका बिरामीहरूलाई अस्पतालमा आएर थप उपचार गराउन चाहनेहरूका लागि विशेष छुटको व्यवस्था गरिएको छ। शिविरमा सहभागी बिरामीहरूले एक हप्ताभित्र अस्पतालमा आएमा ओपिडि टिकट निःशुल्क पाउनेछन्। साथै, अन्य चेकजाँचहरूमा २०% छुट प्रदान गरिनेछ।
वडा नं. २ का अध्यक्ष कलवीर चौधरीले शिविर सफलतापूर्वक सम्पन्न गर्न सहयोग गर्ने सबैलाई धन्यवाद दिँदै यस्ता कार्यक्रमले दुर्गम क्षेत्रका नागरिकलाई ठूलो राहत पुर्याउने बताए। “हाम्रो वडाका नागरिकहरूको स्वास्थ्यमा यस शिविरले सकारात्मक प्रभाव पारेको छ। आगामी दिनमा पनि यस्ता कार्यक्रमलाई निरन्तरता दिन वडा कार्यालयले सहयोग गर्नेछ,” उहाँले भन्नुभयो।
शिविर बिहान ११ बजेदेखि दिनभर सञ्चालन गरिएको थियो। स्थानीय बासिन्दाहरूको उत्साहजनक सहभागिताले कार्यक्रम प्रभावकारी भएको आयोजकहरूले जनाएका छन्।
स्थानीय बासिन्दाहरूले यस्ता शिविरले स्वास्थ्य समस्या पहिचान र समाधानमा महत्वपूर्ण सहयोग पुर्याउने बताए। “घरमै आएर उपचार सेवा दिनु हाम्रो लागि ठूलो राहत हो,” एक सहभागीले बताए ।
नोभा अस्पताल प्रा.लि., धनगढी र बेलौरी नगरपालिका वडा नं. २ को संयुक्त पहलमा सम्पन्न यस शिविरले दुर्गम क्षेत्रका नागरिकलाई स्वास्थ्य सेवाको पहुँचमा उदाहरणीय भूमिका खेलेको छ। आयोजकहरूले आगामी दिनमा पनि यस्ता कार्यक्रम सञ्चालन गर्ने योजना रहेको जानकारी दिएका छन्।
कार्यक्रमको समापनमा आयोजकहरूले सबै सहभागी र सहयोगीलाई धन्यवाद दिँदै यस्ता कार्यक्रमलाई अझ प्रभावकारी बनाउन सामुदायिक सहयोग आवश्यक रहेको औंल्याए।
