अछाम, पुष ९ – नेपालऔषधि व्यवसायी संघ अछामको प्रथम अधिवेशन सम्पन्न भएको छ। अधिवेशनबाट साँफेबगरस्थित धुर्वतारा फार्मेसीका प्रोप्राइटर कृष्णबहादुर कुँवर अध्यक्ष पदमा निर्विरोध चयन भएका छन्।
संघको सचिवमा विमल कुँवर, कोषाध्यक्षमा पुष्प केसी तथा सदस्यहरूमा रामबहादुर भण्डारी, प्रवेश भण्डारी लगायत चयन भएका छन्।
कार्यक्रमका प्रमुख अतिथि नेपाल औषधि व्यवसायी संघका केन्द्रीय सदस्य पृथ्वीबहादुर बमले संघको महत्वपूर्ण भूमिका र औषधि व्यवसायको विकासमा यस अधिवेशनले सुदूरपश्चिममा नयाँ ढोका खोल्ने विश्वास व्यक्त गरे। विशिष्ट अतिथिका रूपमा नेपाल औषधि व्यवसायी संघ सुदूरपश्चिम प्रदेशका अध्यक्ष गजेन्द्रबहादुर लेखक तथा वरिष्ठ उपाध्यक्ष जनकराज जोशीले संघको क्रियाकलापले औषधि व्यवसायीहरूलाई एकताबद्ध गर्न सहयोग पुर्याउने बताएका छन्।
कार्यक्रममा नेपाल औषधि व्यवसायी संघ सुदूरपश्चिम प्रदेशका कोषाध्यक्ष खेमराज भट्ट, डोटी शाखाका अध्यक्ष हिक्मत सिंह चोपडा, कञ्चनपुर शाखाका अध्यक्ष रामचन्द्र बुडा, कैलाली जिल्ला अध्यक्ष प्रेमराज विसीलगायत संघमा आवद्ध सदस्यहरू कमल खनाल र राजन बुढाको उपस्थिति रहेको थियो।
नवनिर्वाचित अध्यक्ष कृष्णबहादुर कुँवरले संघलाई बलियो र सक्षम बनाउन आफूले पहल गर्ने बताए। उहाँले भन्नुभयो, “औषधि व्यवसायीहरूबीच एकता, सहयोग, र व्यवसायिक विकास नै संघको प्रमुख लक्ष्य हुनेछ। हामी सँगै अघि बढेर समाजमा स्वास्थ्य सेवा सहज बनाउने प्रयास गर्नेछौं।”
कार्यक्रमको सञ्चालन विमल कुँवरले गरेका थिए भने स्वागत मन्तव्य प्रवेश भण्डारीले राखेका थिए।
