काठमाडौँ- जल तथा मौसम विज्ञान विभागले आइतवार र सोमवार देशका विभिन्न स्थानमा भारीदेखि अति भारीसम्म वर्षा हुने पूर्वानुमान गर्दै सर्वसाधारणलाई आवश्यक सतर्कता अपनाउन आग्रह गरेको छ।
विभागका अनुसार कोशी, बागमती र गण्डकी प्रदेशका एक/दुई स्थानमा अति भारी वर्षा हुने सम्भावना रहेको छ।
यसै पूर्वानुमानलाई आधार मानेर राष्ट्रिय विपद् जोखिम न्यूनीकरण तथा व्यवस्थापन प्राधिकरणले पनि सूचना जारी गर्दै नदी, खोला तथा पहिरोको जोखिम भएका क्षेत्रका बासिन्दालाई विशेष सावधानी अपनाउन अनुरोध गरेको छ।
प्राधिकरणले जोखिमयुक्त क्षेत्रमा अनावश्यक आवतजावत नगर्न, मौसमको अद्यावधिक जानकारी नियमित रूपमा लिन तथा स्थानीय प्रशासनबाट जारी हुने सूचनाको पालना गर्न सबैमा अपिल गरेको छ।
