अछाम- अछामको मेल्लेख गाउँपालिकाको राजनीतिक वृत्तमा तरंग पैदा हुने गरी नेपाली कम्युनिष्ट पार्टी का पुराना नेता लोकबहादुर बोहरा ‘अविरल’ले पार्टीका सम्पूर्ण जिम्मेवारीबाट अलग हुने घोषणा गरेका छन्।
२०५६ सालदेखि ‘मृत्यु वा मुक्ति’को नारा बोकेर जनयुद्धमा सक्रिय रहेका बोहराले २७ वर्ष लामो राजनीतिक यात्रालाई विश्राम दिने निर्णय सार्वजनिक गरेपछि अछामको राजनीतिक वृत्तमा विभिन्न अड्कलबाजी र प्रतिक्रियाहरू सुरु भएका छन्।
सामाजिक सञ्जालमार्फत आफ्नो निर्णय सार्वजनिक गर्दै बोहराले बाँकी जीवन समाज, देश र सत्यको मार्गमा समर्पित गर्ने उल्लेख गरेका छन्। उनले पार्टी नेतृत्वप्रति कृतज्ञता व्यक्त गरे पनि पार्टीभित्र देखिएका अन्तरविरोध वा आफ्नो निर्णयका कारणबारे खुलाउन चाहेनन्।
माओवादी आन्दोलनका कठिन दिनदेखि पार्टी संगठन निर्माणमा सक्रिय भूमिका निर्वाह गरेका बोहराको बहिर्गमनलाई धेरैले अछामको माओवादी राजनीतिका लागि महत्वपूर्ण घटनाका रूपमा हेरेका छन्। विशेषगरी मेल्लेख गाउँपालिकामा उनको प्रभावशाली राजनीतिक उपस्थितिका कारण यो निर्णयलाई अर्थपूर्ण रूपमा लिइएको छ।
यता मेल्लेख गाउँपालिका अध्यक्ष ज्वाला साउँदले बोहराको निर्णयप्रति सार्वजनिक रूपमा प्रतिक्रिया जनाएका छन्। सामाजिक सञ्जालमा उनले लेखेका छन्, “२७ वर्षको लामो लगानी, बलिदान र संघर्षलाई यति छिटो तिलाञ्जली दिने निर्णय हतारमा त भएन कमरेड? बाँकी शुभकामना!”
बोहराको राजीनामाले अछामको पूर्व माओवादी तथा हालको नेपाली कम्युनिष्ट पार्टीको राजनीतिमा नयाँ बहस सिर्जना गरेको छ। लामो समय आन्दोलन र संगठन निर्माणमा समर्पित नेताको बहिर्गमनले पार्टीभित्र थप चर्चा र समीक्षाको विषय बनेको छ।
Advertisement
