धनगढी- कैलालीको गोदावरी नगरपालिकामा रहेको कालिका लघुवित्त वित्तीय संस्था लिमिटेड शाखा कार्यालय अत्तरियाको आयोजनामा एक दिने केन्द्र प्रमुख गोष्ठी तथा वित्तीय साक्षरता कार्यक्रम सम्पन्न भएको छ।
वित्तीय साक्षरता बढाउने, बचत तथा ऋणको सही प्रयोगबारे जानकारी दिने र केन्द्र प्रमुखहरूबीच समन्वय बढाउन आयोजना गरिएको कार्यक्रम आइतबार सम्पन्न भएको हो ।
कार्यक्रममा प्रमुख अतिथिका रूपमा डबल बहादुर साउँदको उपस्थिति रहेको थियो । कार्यक्रममा बोल्दै उनले वित्तीय साक्षरताले नागरिकलाई आर्थिक रूपमा सक्षम बनाउने उल्लेख गर्दै लघुवित्त संस्थाहरूले ग्रामीण तहसम्म पुर्याइरहेको सेवाको प्रशंसा गरेका थिए ।
कार्यक्रमको सभाध्यक्षता केन्द्र नम्बर ०६१ की केन्द्र प्रमुख पुण्य कुमारी सुवेदी ले गर्नुभएको थियो । त्यसैगरी विशिष्ट अतिथिका रूपमा भैरव बहादुर सिंह तथा पदम बहादुर कार्की रहनुभएको थियो ।
कार्यक्रममा सहभागीहरूलाई बचत, ऋणको सही उपयोग, आर्थिक अनुशासन, वित्तीय योजना तथा सामाजिक उत्तरदायित्व सम्बन्धी जानकारी प्रदान गरिएको थियो । कार्यक्रममा सहभागीहरूले यस्ता कार्यक्रमले आर्थिक चेतना अभिवृद्धि गर्न महत्वपूर्ण भूमिका खेल्ने बताएका थिए ।
उक्त कार्यक्रममा विभिन्न केन्द्रका सदस्य तथा प्रतिनिधिसहित कुल ८० जनाको सहभागिता रहेको आयोजकले जनाएको छ ।
