केदारस्यूँमा सिस्नु पाउडर उत्पादन तालिम सम्पन्न, उद्यमशीलता विकासमा जोड

बझाङ- बझाङको केदारस्यूँ गाउँपालिका- ८ मा सिस्नु पाउडर प्रशोधन तथा उत्पादन सम्बन्धी ७ दिने सीप विकास तालिम सम्पन्न भएको छ । गरिबी निवारणका लागि लघु उद्यम विकास कार्यक्रम अन्तर्गत गाउँपालिका उद्यम विकास शाखाको आयोजनामा सञ्चालन गरिएको तालिम शनिबार वडा कार्यालय टुडिखेलमा सम्पन्न भएको हो ।
स्थानीय स्तरमै उपलब्ध कच्चापदार्थको प्रयोगमार्फत नागरिकलाई आत्मनिर्भर बनाउने उद्देश्यले सञ्चालन गरिएको तालिममा सिस्नु संकलन, व्यवस्थापन, पाउडर बनाउने विधि तथा प्याकेजिङ्ग सम्बन्धी व्यावहारिक ज्ञान प्रदान गरिएको थियो । वडाभरिका १९ जनाको सहभागिता रहेको तालिममा प्रशिक्षक लोकराज पन्त ले सहजीकरण गरेका थिए ।
समापन कार्यक्रममा गाउँपालिका अध्यक्ष गणेशबहादुर बोहरा ले सिकेको सीपलाई व्यवहारमा लागू गर्न सहभागीलाई आग्रह गरेका थिए । विभिन्न समयमा सञ्चालन गरिएका तालिमबाट अपेक्षाअनुसार उपलब्धि नदेखिएको उल्लेख गर्दै उनले सीपलाई उद्यममा रूपान्तरण गर्नुपर्नेमा जोड दिए । साथै, उद्यमशील बन्न इच्छुक व्यक्तिलाई गाउँपालिकाले आवश्यक सहयोग र सहजीकरण गर्ने प्रतिबद्धता समेत व्यक्त गरेका छन्
त्यस्तै वडा नं. ८ का वडाध्यक्ष सुरेश बहादुर जेठारा ले तालिमबाट सिकेको सीप व्यवहारमा उतारेर उत्पादन सुरु गर्न सहभागीलाई आग्रह गरे । “तपाईंहरू उत्पादनमा लाग्नुहोस्, बजारीकरणको व्यवस्थापनमा हामी सहयोग गर्छौं,” उनले भने ।
कार्यक्रम सञ्चालन गाउँपालिका उद्यम विकास शाखाका धर्म जेठराले गरेका थिए ।