आज देशभर बदली, धेरै स्थानमा मेघगर्जनसहित वर्षाको सम्भावना

धनगढी- मौसम आज गण्डकी, लुम्बिनी, कर्णाली र सुदूरपश्चिम प्रदेशमा पूर्णतया बदली रहेको छ भने देशका अन्य स्थानमा पनि आंशिकदेखि सामान्य बदली रहेको छ। बागमती, लुम्बिनी, कर्णाली र सुदूरपश्चिम प्रदेशका केही स्थानमा मेघगर्जन तथा चट्याङसहित हल्का वर्षा भइरहेको मौसम पूर्वानुमान महाशाखाले जनाएको छ।
महाशाखाले आज बिहान ८ बजे जारी गरेको प्रक्षेपणअनुसार दिउँसो गण्डकी, लुम्बिनी, कर्णाली र सुदूरपश्चिम प्रदेशमा पूर्ण बदली रहनेछ भने अन्य स्थानमा सामान्य बदली रहनेछ। यी प्रदेशका धेरै स्थानमा तथा कोसी र बागमती प्रदेशका पहाडी तथा हिमाली भूभागका केही स्थानमा, साथै मधेस प्रदेश र कोसी–बागमतीका तराई क्षेत्रमा थोरै स्थानमा मेघगर्जन, चट्याङ, हुरी र असिनासहित मध्यम वर्षा वा हिमपातको सम्भावना रहेको छ। गण्डकी, लुम्बिनी, कर्णाली र सुदूरपश्चिमका पहाडी तथा हिमाली भूभागका एक–दुई स्थानमा भारी वर्षा वा हिमपात हुन सक्ने सम्भावना पनि रहेको छ।
यसै क्रममा आज काठमाडौँ उपत्यकामा पनि मेघगर्जनसहित मध्यम वर्षाको सम्भावना रहेको मौसमविद् रोजन लामिछानेले जानकारी दिएका छन्। उनका अनुसार हाल उपत्यकाको आकाश पनि बादलले ढाकिएको छ र दिनभर वर्षाको सम्भावना देखिएको छ।
राति देशभर सामान्यदेखि पूर्ण बदली रहनेछ। कोसी, मधेस र बागमती प्रदेशका साथै पहाडी तथा हिमाली भूभागका केही स्थान र अन्य तराई क्षेत्रमा थोरै स्थानमा मेघगर्जन तथा चट्याङसहित मध्यम वर्षा वा हिमपात हुन सक्ने सम्भावना रहेको महाशाखाले जनाएको छ।